मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

नेपाल   

विकास बजेट खर्च हुन सकेन, एक अर्ब फ्रिज हुने

विकास बजेट खर्च हुन सकेन, एक अर्ब फ्रिज हुने


चितवन । जेठ महिनाको अन्तिम समयसम्म चितवनको कुल विकास बजेटमध्ये ३६ प्रतिशतमात्र खर्च भएको छ । आर्थिक वर्षको अन्तिम महिनासम्म आइपुग्दा विकास बजेटको आधा रकम पनि खर्च नहुनाले चितवनमा यस वर्ष विकास गतिविधि खासै नभएको पुष्टि हुन्छ । अघिल्लो आर्थिक वर्षमा चितवनको विकास बजेट खर्च ७० प्रतिशतको हाराहारीमा रहेको थियो । 

कोष तथा लेखा नियन्त्रकको कार्यालय भरतपुरले दिएको जानकारीअनुसार चितवनको कुल विकास बजेट २ अर्ब २६ करोड ७६ लाख ९५ हजारमध्ये जेठ मसान्तसम्ममा ८२ करोड ३१ लाख ५८ हजार ७८२ खर्च भएको छ । 

जेठ महिनामा मात्रै २३ करोड ६० लाख ४१ हजार विकास बजेट निकासा भएको कार्यालयका प्रमुख कोष नियन्त्रक नारायण शर्माले जानकारी दिए । उनका अनुसार कुल बजेटको लगभग आधा हिस्सा रहेको मुग्लिन–नारायणगढ सडक खण्डको बजेट २४ करोडमात्र खर्च भएको छ । 
ठेकेदार पक्षले मोबिलाइजेसन खर्चअन्तर्गत २४ करोड गत वैशाख र जेठ महिनामा निकालेपछि चितवनको विकास बजेट केही बढेको देखिएको हो । अघिल्लो वर्ष यस आयोजनाको सम्झौता नहुँदा पूरै रकम फिर्ता भएको थियो । 

यस चालू आवमा सम्झौता भएर सर्वेको काम जारी रहेको छ । ‘२४ करोड ९६ लाख मोबिलाइजेसनबापत निकासा भएको छ, प्रमुख शर्माले भने, ‘बाँकी रकम खर्च नहुने पक्का भएको छ ।’ यसरी हेर्दा चितवनमा प्राप्त विकास बजेटमध्ये यस चालु आवमा झण्डै १ अर्ब रूपैयाँ फ्रिज हुने देखिएको छ । 

विकास गतिविधि सञ्चालन गर्ने जिल्ला विकास समिति, सडक डिभिजनलगायतका कार्यालयले पनि खर्च गर्न सकिरहेका छैनन् । हालसम्म चितवनको कुल बजेटको ३६ प्रतिशतमात्र खर्च भएको देखिएकोमा असार मसान्तसम्म खर्च प्रतिशत ७० को हाराहारीमा पुग्ने प्रमुख शर्माको भनाइ छ । तर सरसर्ती हेर्दा चितवनको विकास बजेट चालु आवमा ५० प्रतिशतबाट केहीमात्र उकालो लाग्ने देखिएको छ । 

नारायणगढ–मुग्लिन सडक खण्डको ७९ करोड खर्च नहुने पक्का भएको छ । त्यस्तै, सडक डिभिजन कार्यालय भरतपुरको यस चाल वर्षको कुल बजेट ३० करोड रहेकोमा हालसम्म १० करोडमात्र खर्च भएको छ । यस कार्यालयका केही कामहरु जारी रहेकाले खर्च बढ्ने उनले बताए । 
जिल्ला विकास समिति चितवनको कुल १३ करोड ६६ लाखमध्ये हालसम्म जम्मा ६ करोडमात्र खर्च भएको छ । अधिकांश कार्यालयले आधाभन्दा बढी बजेट खर्च गरे पनि करोडौं रकम भएका कार्यालयले आधा पनि रकम खर्च गर्न सकेका छैनन् । 

असार २५ गतेसम्म रकम भुक्तानी प्रक्रिया जारी रहने हुँदा खर्च प्रतिशतमा केही घटबढ हुनसक्ने प्रमुख नारायण शर्माको भनाइ छ ।