चितवन । उच्च मावि शिक्षा परिषद्ले चितवनका चार उच्च माविहरु खारेज गर्ने तयारी गरेको छ । दुई वा तीन वर्षदेखि लगातार कक्षा सञ्चालन नगरेका उच्च माविहरुलाई खारेज गर्न लागेको परिषद्ले जनाएको छ । 

खारेज भएका उच्च माविलाई विद्यार्थी भर्ना नलिन परिषद्ले चेतावनी दिएको छ । परिषद्ले निकालेको सूचनामा चितवनका स्मल हेभन, शहीद स्मृति बहुमुखी क्याम्पस, हिलबर्र्ड आवासीय र मृगस्थली शिक्षा निकेतन रहेका छन् । यीमध्ये ३ निजी हुन् भने शहीद स्मृति कलेज हो । परिषद्ले देशभरका यस्ता ७२ उच्च माविको सम्बन्धन खारेज गर्न लागेकोे हो । 

परिषद्ले साउन एक गतेबाट लागू हुने गरेर खारेज प्रक्रिया अगाडि बढाउने जनाएको छ । सम्बन्धन खारेज गर्नु नपर्ने भएमा स्पष्ट कारणसहित परिषद्मा प्रष्टीकरण दिन निर्देशन गरिएको छ । परिषद्ले १५ दिनभित्र लिखित प्रमाणसहित प्रष्टीकरण माग गरेको छ ।

चित्त बुझ्दो प्रष्टीकरण नआएमा वा प्रष्टीकरण नदिएमा उच्च माविहरु स्वतः खारेज गर्ने परिषद्ले चेतावनी दिएको छ । परिषद्ले सूचना प्रकाशित भएका उच्च माविहरुलाई साउन १ गतेदेखि सञ्चालन हुने शैक्षिक कार्यक्रममा कक्षा ११ का विद्यार्थी भर्ना नगराउन भनेको छ । 

चितवनमा उच्च मावि सञ्चालकहरुको संस्था हिसानमा आवद्ध निजी उच्च माविहरुको संख्या १४ रहेका छन् । जसमा पाँच हजारभन्दा धेरै विद्यार्थी पढ्छन् । एसएलसी परीक्षाको नतिजा सार्वजनिक भएकाले उच्चमाविहरुमा भर्नाका लागि विद्यार्थीको भीड लाग्न थालेको छ । चितवनका उच्च माविहरुमा जिल्लाका साथै जिल्ला बाहिरका विद्यार्थीहरुको पनि आकर्षण बढेको छ ।

चितवनका निजी उच्च माविहरु विज्ञान र व्यवस्थापन विषयमा देशमै कहलिएका छन् । गत वर्ष कक्षा ११ को परीक्षामा विज्ञानमा चितवनकै वाल्मीकि शिक्षा सदनका विद्यार्थीले नेपाल टप गरेका थिए । विज्ञानमा पनि अघिल्ला वर्षहरुमा यस्तै उत्कृष्ट नतिजा आउने गरेको थियो ।
जिल्लामा उत्कृष्ट उच्च माविहरु पर्याप्त भएकाले प्रक्रियागत रुपमा उच्च मावि शिक्षा परिषद्बाट आउने सूचनाले विद्यार्थीलाई सूचित गराए पनि यहाँको शैक्षिक वातावरण प्रभाव नपर्ने शिक्षालय सञ्चालकहरुको धारणा छ । चितवनमा गण्डकी, धौलागिरी अञ्चलका जिल्लाहरुबाट प्रशस्तै विद्यार्थी आएर पढ्ने पहिलेदेखि चलन हो ।