गजुरी (धादिङ)।  पृथ्वीराजमार्गको बैरेनी गाविस–८ मछेडीखोलामा गरिएको आकस्मिक जाँचका क्रममा आज १७५ केजी चरेससहित तीन जनालाई इलाका प्रहरी कार्यालय गजुरीले पक्राउ गरेको छ ।

 

  प्रहरी टोलीले जाँच गरिरहेको बेला विपरीत दिशामा गाडी पार्किङ गरेको अवस्थामा युपी७७टी ४८१३ नं को गाडीसमेत प्रहरीले नियन्त्रणमा लिएको छ । भूमेस्थानस्थित एक्ले क्षेत्रबाट गाडीका फल्स बटम बनाइएको स्थानमा राखी लुकाइछिपाइ भारतको उत्तरप्रदेशतर्फ लैजाँदै गरेको अवस्थामा अन्दाजी एक केजी को १५७ पोका र  अन्दाजी ५०० ग्रामको ८० पोका चरेस बरामद गरिएको इलाका प्रहरी कार्यालय गजुरीका प्रहरी निरीक्षक हेमन्त भण्डारीले बताउनुभयो ।

 

  प्रहरीले गाडी चालक भारतको कानपुर सीतापूर्वका २६ वर्षीय राजेश कुमार र २० वर्षीय विवेक कुमार तथा रक्सौल बस्ने ४३ वर्षीय रघुनाथ दासलाई पक्राउ गरेको छ । 

–ः ५३ ः–

 

चरेस ओसारपसारमा प्रयोग गरिएको गाडी, भारतीय रूपैयाँ ८७ हजार ३००, नेपाली रु आठ हजार, तीन थान मोबाइलसमेत बरामद गरिएको प्रहरीले जानकारी दिएको छ । ठूलो मात्रामा चरेसको कारोबार गर्ने समूहसहितको टोलीलाई प्रहरीले पहिचान गरी कानुनी दायरामा ल्याइएको प्रहरीले जिकिर गरेको छ । रासस