चितवन । पुनरावेदन अदालत हेटौंडाले बिहीबार फुजेलका कृष्णप्रसाद अधिकारी हत्या प्रकरणमा यसअघि जिल्ला अदालत चितवनले गरेको थुनछेकको आदेशलाई सदर गरेको छ । 

 

पुनरावेदन अदालतका न्यायाधीशद्वय हरिकुमार पोखरेल र तीलप्रसाद श्रेष्ठको संयुक्त इजलासले आदेशको सदर गरेको हो । जिल्ला अदालत चितवनले अधिकारी हत्या प्रकरणमा १३ जना हत्या आरोपीविरुद्ध आदेश गरेको थियो । जसमा एक जना रूद्र आचार्य विदेशमा रहेकोले अनुपस्थित थिए भने बाँकी १२ जनामध्ये तीन जनालाई शुद्ध तारिख र नौ जनालाई धरौटीमा रिहा गर्ने आदेश दिएको थियो ।

 

सुरूदेखि यस घटनाको अध्ययन गर्दै आएका अधिवक्ता खगराज कँडेलले सम्पूर्ण प्रक्रिया सकिएपछि मुद्दाको अन्तिम फैसला गर्ने अधिकार चितवन जिल्ला अदालतमा आएको जानकारी गराए ।