हिमालय खबर चितवन (माडी) । माडी नगरपालिकाको लक्ष्मुनिया गाँउमा १४ वर्ष पुरानो पुलमाथिबाट क्षमताभन्दा बढी लोडसहितको ट्रिपरले गाब्रेलिङ ओसारपसार गरेपछि भाँचिएको छ । निर्माणाधीन कृषि सडकमा ग्राबेलिङ गर्न सडक निर्माण उपभोक्ता समितिले स्थानीयसँग छलफल तथा पुलको अवस्था मध्यनजर नगरी बिहानदेखि ग्राबेल ओसारपसार गर्न थालिएपछि पुल दिउँसो २ बजेर ३० मिनेट जाँदा भाँचिएको हो ।
बरुवा लक्ष्मुनिया जोड्ने सो पुल भाँचिएपछि नजिकिएको वर्षायाममा करिब १ हजार ५ सय घरधुरीका सर्वसाधारणले सास्ती खेप्नुपर्ने भएको छ । २०५८ सालमा ३ लाख रुपैयाँमा निर्माण भएको सो पुलको लम्बाई १५ मिटर तथा चोडाई ५ मिटरको रहेको छ । पुल निर्माण समितिका अध्यक्ष गंगाधर पौडेल रहेका थिए । पुल भाँचिए पनि चालक भने सकुशल नै रहेको जनाइएको छ ।
सांसद विकास कोषअन्तर्गतको बजेट कृषि सडक निर्माणका लागि सभासद् विक्रम पाण्डेले ग्रामीण सडक विस्तार कार्य थालनी गरिरहेका छन् । कृषि सडक निर्माण उपभोक्ता समितिको अध्यक्षमा राप्रपाका स्थानीय नेता मदन पौडेल छन् । १२ टनबराबरको क्षमता रहेको सो पुलमा २० टनभन्दा बढी लोडसहितका ट्रिपर चलाउनु नै स्थानीयले पुल भाँचिनुको कारण भएको दाबी गरेका छन् ।
कमजोर ईन्जिनियरिङ र पुल पनि पटकपटकको बाढीको धक्काले चर्किसकेको थियो । कृषि सडक निर्माण उपभोक्ता समितिले समेत चालकलाई सचेत नगर्नु, चालकको लापरबाही, पुल कमजोर बन्नुजस्ता कारणले दुर्घटना भएको जनाइएको छ । स्थानीयले तत्काल पुल निर्माणको माग गरेका छन् ।
प्रतिक्रिया