पाँचथर । ताप्लेजुङको उत्तर–पश्चिमी छ वटा गाउँ विकास समितिमा बुधबार राति गएको पहिरोमा परी मृत्यु हुनेको सङ्ख्या ५७ पुगेको छ । स्थानीयवासीले पहिरोमा पुरिएर ५७ जनाको मृत्यु भएको बताएका छन् । प्रहरीले भने अहिलेसम्म २३ जनाको शव फेला परेको र ३७ जना बेपत्ता रहेको जनाएको छ ।

 

घटनामा परी गम्भीर घाइते भएका १० जनालाई नेपाली सेनाको हेलिकप्टरबाट जिल्ला अस्पताल ताप्लेजुङ पु¥याइएको छ । तीमध्ये पाँच जनाको अवस्था नाजुक रहेको छ । स्थानीयवासी हेम लिवाङका अनुसार लिवाङ गाविसको वडा नं १ मा १२ जना, २ मा आठ जना, ३ मा चार जना, ४ र ६ मा एक÷एक जना गरी २६ जनाको मृत्यु भएको छ ।

 

उहाँका अनुसार मृत्यु हुनेमा वडा नं १ का सञ्चहाङ फेम्सोहाङको एकै परिवारका नौ जनासहित एउटै घरमा रहेका १० जनाको मृत्यु भएको छ । यस्तै, सान्थाक्रामामा १२ जना, खोक्लिङमा नौ जना, थिङलाबुको याक्पेलीमा पाँच जना र लिङतेपमा पाँच जनाको मृत्यु भएको छ ।

 

पश्चिमी ताप्लेजुङका छ गाविसका खोला आसपास र डाँडामा रहेका दुई दर्जनभन्दा बढी घर पहिरोले बगाएको छ । पहिरोले लिङतेप, खोक्लिङ, लिवाङ र थिङलाबु गाविस सबैभन्दा बढी प्रभावित भएका छन् । लगातारको झरीका कारण खोजी तथा उद्धारमा कठिनाइ भएको प्रमुख जिल्ला अधिकारी डमरूप्रसाद निरौलाले बताउनुभयो । 

 

उहाँले भन्नुभयो, “गएरातिको वर्षाले ठाउँ–ठाउँमा पहिरो झरेकाले झनै समस्या परिरहेको छ, घटनास्थलमा पुग्न बाटो नभएकाले वैकल्पिक बाटोको प्रयोग गरेर सुरक्षा निकाय गइरहेका छन् ।”

 

 

प्रधानमन्त्री र एमाले अध्यक्षको अवलोकन कार्यक्रम स्थगित

 

मौसममा खराबी भएका कारण प्रधानमन्त्री सुशील कोइराला र नेकपा एमालेका अध्यक्ष केपी शर्मा ओलीको आजको प्रभावित क्षेत्र अवलोकन कार्यक्रमसमेत स्थगित भएको छ । प्रभावित क्षेत्रमा कुहिरो लागिरहेका कारण उद्धारका लागि आएको हेलिकप्टर सशस्त्र प्रहरी बलको कञ्चनजङ्गा गुल्ममा रोकिएको प्रजिअ डमरूप्रसाद निरौलाले जानकारी दिनुभयो ।

 

ताप्लेजुङको पश्चिमी क्षेत्रमा गएको पहिरोमा परी लिवाङ गाविसको ल्यामल्याममा फसेका १४ जनाको अझै उद्धार हुन सकेको छैन । बुधबार राति गएको पहिरोको निरीक्षणका लागि प्रधानमन्त्री, एमाले अध्यक्ष र प्रधानसेनापति राणासहितको टोली यहाँ आउने कार्यक्रम थियो ।

 

काँग्रेसद्वारा दुःख व्यक्त 

ताप्लेजुङमा अविरल वर्षाका कारण पश्चिमी क्षेत्रका विभिन्न गाउँमा पहिरोले भएको क्षतिप्रति सत्तारुढ दल नेपाली काँग्रेसले गहिरो दुःख व्यक्त गरेको छ । नेपाली काँग्रेस केन्द्रीय कार्यालयका मुख्यसचिव ऋषिकेश तिवारीले आज एक विज्ञप्ति जारी गर्दै पाँच दर्जनभन्दा बढी व्यक्तिको मृत्यु, दर्जनौँ व्यक्ति बेपत्ता, भौतिक सम्पत्तिको क्षति र ठूलो सङ्ख्यामा विस्थापित भएको घटनाप्रति दुःख प्रकट गर्नु भएको हो । काँग्रेसले विज्ञप्तिमार्फत दिवङ्गत आत्माको चिर शान्तिको कामना गर्दै शोक सन्तप्त परिवारप्रति साहस र धैर्यपूर्वक विपत्तिको सामना गर्न आग्रह गरेको छ । 

 

प्र्राकृतिक विपत्को यस घडीमा सम्पूर्ण प्रभावित जनताप्रति पार्टीले आफ्नो साथ, सहयोग र ऐक्यबद्धता जाहेर गर्नुका साथै हराएका व्यक्तिहरूको तदारुकताका साथ खोजी, घाइतेको उपचारको प्रबन्ध तथा पीडित परिवारलाई तत्काल राहत र सहयोग गर्न सरकारसँग आग्रह गरेको छ । यस्तै काँग्रेसका स्थानीय पार्टी निकायहरू तथा भ्रातृ एवम् शुभेच्छुक सङ्घसंस्थालाई पीडित परिवारको उद्धार गर्न, राहत उपलब्ध गराउन तथा आवश्यक सहयोग पु¥याउन नेपाली काँग्रेसले निर्देशनसमेत दिएको छ । रासस