दुई जना बृद्धलाई २ लाख ७० हजार अमेरिकी डलर ठगी गरेको आरोपमा नेपाली युवालाई स्थानिय प्रहरीले पक्राउ गरेको छ ।

नाशभिल वस्ने ग्रिनकार्ड प्राप्त ३० बर्षका नेपाली तुलसीराम तिमिल्सनालाई गत डिसेम्बर १० मा ती बृद्धलाई विभिन्न वहानामा ठगी गरेको आरोपमा पक्राउ गरिएको स्थानिय टेलिभिजन च्यानल फक्स १७ ले जनाएको छ ।

पुटनम काउन्टी सेरिफ कार्यालयका अनुसार यो ठगी योजना सेप्टेम्बर १९ मा शुरु भएको थियो । पिडितको वयान अनुसार एकजनाको कम्प्युटरमा पप अफ हुदैं अलर्ट देखा पर्यो । उक्त सन्देश माइक्रोसफ्टवाट आएको जस्तो देखिन्थ्यो । त्यसमा दिईएको फोन नम्बरमा कल गर्न भनिएको थियो ।

पिडितले उक्त नम्बरमा फोन गर्दा उठाउन व्यक्तिले कम्प्यूटर ह्याक भएको वताउंदै बैंकसंग सम्पर्क गर्नुपर्ने भन्यो ।

ती बृद्धाले आफ्नो क्रेडिट कार्डको पछाडीपट्टीको उल्लेख गरिएको नम्बरमा फोन गरिन । तर, उक्त फोन नम्बर पनि बैंकको आधिकारिक थिएन । उक्त व्यक्तिले पिडितको कम्प्युटरमा बाल अश्लील सामग्री भेटिएको आरोपमा संघीय अनुसन्धान अन्तर्गत रहेको वताउंदै यसवारेमा कसैलाई नभन्न भन्यो ।

सेरिफहखे कार्यालयका अनुसार त्यसपछि पिडितहरुलाई स्पेन्सर कोइन एण्ड सिल्भर वाट सुन किन्न निर्देशन दिइयो । उनीहरुले अक्टोबर ३ मा सुन चांदी किने । सेप्टेम्बर १९ देखि नोभेम्बर ५ सम्मको अवधिमा पिडितहरुले जम्मा २ लाख २८ हजार सय २९ डलर निकाले र सुन किन्न स्थान्तरण गरेका थिए ।

नोभेम्बर ५ मा एक जना अज्ञात पुरुष पीडितको घरमा सिक्का लिन आएको थियो । त्यही वेला पीडितका श्रीमानले उक्त व्यक्तिको र उसको गाडीको तस्बिर खिचेका थिए सेरिफ कार्यालयका अनुसार पीडितका श्रीमानलेआफ्नो रिटायमेन्ट खाता बारे बैंकवाट कुनै जानकारी नआएपछि प्रहरीसंग सम्पर्क गरेका थिए ।

त्यही खिचेका तस्विरका आधारमा प्रहरीले नाशभिल निवासी तिमिल्सनालाई पहिचान गरेको थियो । उनलाई गत वुधवार नियन्त्रणमा लिएर जेष्ठ नागरिककको आर्थिक शोषण आरोपमा पक्राउ गरिएको हो । पक्राउ गरेका तिमिल्सनासंग २ लाख डलर धेरौटी मागिएको छ ।

तिमिल्सना नेपालवाट आएका र ग्रिनकार्डमा अमेरिकामा बसोबास गरिरहेको सेरिफ कार्यालयले जनाएको छ । अमेरिकामा वस्ने नेपाली यस प्रकारका ठगी प्रकरणमा संलग्न भएको यो संभवत पहिलो हो ।

स्थानिय प्रहरीले यदी कसैलेृ ठगी गर्न लागेको शंका लागेमा तत्काल प्रहरी वा सम्वन्धित निकायमा सम्पर्क गर्न अनुरोध गरेको छ । तिमिल्सनालाई जनवरी १६ मा अदालतमा उपस्थित गराउन मिती तोकिएको छ ।