ड्यालस (टेक्सस) । अमेरिकाका ४५ औँ राष्ट्रपति डोनाल्ड जोन ट्रम्प बिहीबार फौजदारी अभियोगबाट दोषी ठहर भएका छन् । विगतमा खुल्ला जीवनमा छँदा पोर्नस्टारसँग यौन सम्पर्क राखेको र त्यसलाई बारम्बार ढाँटेको अभियोगमा उनी न्यूयोर्क राज्यको सर्वोच्च अदालतबाट दोषी प्रमाणित भएका छन् ।

आधुनिक अमेरिकाको इतिहासमा पूर्वराष्ट्रपति यस खालको नैतिक पतन देखिने अभियोगबाट दोषी प्रमाणित हुुने उनी पहिलो व्यक्ति हुन् । सन् २०१६ मा चुनावी प्रचारको सिलसिलामा ट्रम्पले विगतमा यौनतृष्णा मेट्ने गरेकी पोर्नस्टार सार्वजनिक भइन् । जसलाई मुखबुजो लगाउन ट्रम्पले एकलाख ३० हजार डलर तिरे । तर, यो रकम उनले आफ्नो खल्तीबाट नभै चुनावी प्रचारप्रसारका लागि अमेरिकी जनताबाट संकलन गरेको रकमबाट तिरिएको थियो ।

ट्रम्पले सुरूमा त पोर्नस्टारसँग सम्पर्क राखेको कुरालाई इन्कार गरिरहे । कतिसम्म भने उनले ुचिन्दै नचिनेकोु भन्दै मिडिया, सर्वसाधारणलाई लगातार ढाँटे । झुठ बोलिरहे । मुखबुजो लगाउन एकलाख ३० हजार तिरेको कुरा त उनले सार्वजनिक गर्ने कुरै भएन ।

ट्रम्प राष्ट्रपति छउन्जेलसम्म पनि पोर्नस्टारले यो विषय उठाइरहिन् । मिडियामा पनि आइरहे । जुनजुन मिडियाले यो विषयमा समाचार, टिप्पणी लेख्थे ट्रम्पले ुफेक मिडियाु, फेक न्यूज भनिदिन्थे । ट्रम्प समर्थकहरु उनको भनाईलाई दायाँबाँया, तलमाथि केही नसोची अन्धाधुन्द समर्थन गर्दै विश्वास गर्थे ।

तर, लामो बहस, १२ जना जुरीहरुको राय पछि अदालतले ३४ वटा विषयमा डोनाल्ड ट्रम्पलाई दोषी ठहर गर्दै जेल सजाय तोेकेको छ । उनलाई कति दिनको या महिनाको या वर्षको जेल सजाय हुने भन्नेचाहिँ न्यायाधीशले तय गर्नेछन् । यद्यपि जेल सजायभन्दा पनि इतिहासमै पहिलोपटक अमेरिकी राष्ट्रपति फौजदारी अभियोग प्रमाणित भएर दोषी ठहरिनुले अमेरिकामा निकै चिन्ता र चासोका रुपमा यो फैसलालाई लिइएको छ ।

उनी जुलाई ११ तारिक अदालतमा हाजिर भएपछि मात्र कति दिन थुन्ने हो भन्ने बारेमा निधो हुने जनाइएको छ ।

ट्रम्प पूर्वराष्ट्रपति मात्र होइनन्, उनी यो वर्षको नोभेम्बरमा हुने चुनावमा रिपब्लिकन पार्टीभित्रबाट सबैभन्दा बलिया उमेदवार पनि हुन् । रिपब्लिकन पार्टीभित्रको प्राइमरी इलेक्सनमा उनले आफ्ना सबै विपक्षीहरुलाई सोत्तर बनाउँदै जित्दै आएका छन् । तर, अदालतले फौजदारी अभियोगमा दोषी ठहर गरेको व्यक्ति अब उम्मेदवार बनाउने कि नबनाउने भन्ने विषयमा रिपब्लिकन पार्टीभित्र एक खालको तरङ्ग भने पैदा गरेको छ ।

ट्रम्प समर्थक रिपब्लिकन, जसलाई बोलीचालीको शब्दमा ‘मागा रिपब्लिकन’ भनिन्छ । ‘मागा रिपब्लिकन’हरुले विहीबारको अदालतको फैसलाविरुद्ध दिएको अभिव्यक्ति हेर्दा, सुन्दा र पढ्दा अमेरिकी राजनीति झनै ठूलो ध्रुबीकरणमा फँस्नले संकेत मिलेको छ । यद्यपि पहिले देखिनै ट्रम्पलाई पार्टीले उम्मेदवार बनाउनु हुँदैन भन्ने लाइनमा रहेका रिपब्लिकन नेताहरुलाई भने अदालतको फैसलाले बल पुगेको छ ।

एउटा स्मरणीय तथ्य के छ भने अमेरिकामा जेल सजाय पाएको व्यक्ति उमेदवार बन्न पाउँछ । उसले भोट हाल्न पाउँदैन, तर उम्मेदवार हुन पाउने कानुनी व्यबस्था छ । त्यसो हुँदा आउँदो चुनावमा ट्रम्प उम्मेदवार हुने लगभग निश्चित नै छ । तर, अदालतबाट दोषी प्रमाणित भैसकेका व्यक्तिलाई भोट दिन मागा रिपब्लिकन भन्दा अन्य पुरातनवादी रिपब्लिकनलाई चासो नहुने सम्भावना पनि बढ्दो छ ।

डोनाल्ड ट्रम्पविरुद्ध अन्य तीनवटा ठूला मुद्दाहरु अहिले पनि अदालतमा विचाराधिन छन् । सन् २०२० को चुनावमा पराजय पनि आफ्ना समर्थकहरु उचालेर अमेरिकी संसद भवन क्यापिटल हिलमा आक्रमण, महत्त्वपूर्ण सरकारी डकुमेन्टहरु लिएर गएकोलगायतका विषयमा फ्लोरिडा, वासिङ्गटन र जर्जियाका अदालतहरुमा मुद्धा चलिरहेका छन् ।

बिहीबारको फैसला माथि ट्रम्पले माथिल्लो अदालतमा पुनरावेदन गर्ने सम्भावना रहेको छ । उनी पुनरावेदनमा गएको खण्डमा आउँदो चुनाव अघि फैसलाको संभावना टर्नेछ ।

अमेरिकामा सार्वजनिक पदाधिकारीहरुको नैतिकता जाँचमा सत्य बोल्ने कुरालाई निकै महत्वपूर्ण रुपमा लिइन्छ । तर लगातार ढाँटिरहने, परस्त्रीगमन मात्र नभएर पोर्नस्टारसँग यौन सम्बन्ध राखेको र चुनावी प्रचारप्रसारको रकम तिरेर मुखबुजो लगाएको विषयलाई अमेरिकी जनताले कसरी लिन्छन् ? त्यसको लागि आउँदो नोभेम्बर ५ तारिकसम्म पर्खनुपर्नेछ । यद्यपी मागा रिपब्लिकन भित्र भने ट्रम्पलाई भगवान र जिससका रुपमा समेत लिने एउटा ठूलो वर्ग छ । जुन वर्ग ट्रम्पले जे जस्तो अनैतिक काम गरेपनि भगवानको आशिर्वाद र कृपामा भएको भन्दै ढाकछोप गरिरहेको देखिन्छ ।