चितवन । नेपाल पत्रकार महासंघ चितवन शाखाको आयोजनामा ‘प्रवासमा पत्रकारिता’ विषयक छलफल तथा अन्तर्क्रिया कार्यक्रम दियालो फुडल्यान्ड नारायणगढमा सम्पन्न भएको छ ।

नेपाल पत्रकार महासंघ चितवन शाखाका पूर्वअध्यक्ष वेदप्रसाद खरेलले प्रवासमा पत्रकारिता सोचेजस्तो सजिलो नरहेको बताउँदै १२ घन्टा काम सकेर पत्रकारिता गर्नु निकै कठिन कार्य रहेको बताए । नेपालमा पत्रकारिता पेसा गर्दागर्दै अमेरिका पुगेका खरेलले सन् २००६ देखि २०११ सम्म नेपालीन्यूजयुएसएडटकम सञ्चालन गरेका उनले संस्थागतरुपमा विज्ञापन नआउने भएकाले प्रवासमा पत्रकारिता गरेरै बाँच्न कठिन हुने बताए ।

उनले चितवनमा पत्रकारिता गर्दा पहिलो समाचार ‘अस्पतालको बेहाल ; डाक्टरहरु कमाउन व्यस्त’ शीर्षकको समाचार लेखेको स्मरण गर्दै अहिलेको समयजस्तो त्यतिबेला पत्रकारिता गर्न सहज नभएको उल्लेख गरे । आफू चितवनको अध्यक्ष रहँदा पत्रकारहरुलाई यातायातमा ५० प्रतिशत छूट र अस्पतालमा छूट सुविधा दिलाएको बताए । अमेरिकाको बसाइँ बिट मार्दै नेपालमा केमिकल इन्डस्ट्री सञ्चालन गर्न लागेको जानकारी दिए ।

नेपाल पत्रकार महासंघ चितवन शाखाका पूर्वअध्यक्ष कृष्ण भण्डारीले प्रवासमा पत्रकारिता गर्न निकै दुःख रहेको बताए । नेपाल पत्रकार महासंघ जापानका सल्लाहकारसमेत रहेका भण्डारीले काम गरेर बचेको समय पत्रकारितामार्फत नेपाली समाज, धर्म र संस्कृतिलाई जोड्ने पुलको काम गरिरहेको बताए ।

यस्तै, अमेरिका नपाल पत्रकार संघ (नेजा)का पूर्वअध्यक्ष तथा अमेरिकाको टेक्सासमा विगत १४ वर्षदेखि प्रतिनिधिमूलक डिजिटल पत्रिका हिमालयखबर सञ्चालन गर्दै आएका विकाशराज न्यौपानेले प्रवासको पत्रकारिता सोचेजस्तो सहज नरहेको र अझैसम्म व्यावसायिक हुन नसकेको बताए ।

उनले अमेरिकामा करिब पाँच लाख नेपाली रहेकोमा टेक्सास, डालासमा मात्रै एक लाख नेपाली रहेको र उनीहरुलाई धर्म र संस्कृतिसँग जोड्ने, विज्ञ भेला गर्ने र परोपकारी कार्यमा जोड्न पत्रकारिताले महत्वपूर्ण भूमिका निर्वाह गरेको बताए ।

नेपालमा लामो समय व्यावसायिक पत्रकारिता गरी अमेरिकामा रही विभिन्न पेसामा आवद्ध पत्रकारहरुलाई एकीकृत गरी हिमालयखबरमा आवद्ध गरी नेपाली समुदायका हरेक दुःखसुखमा सारथिको काम गरिरहेको उनले सुनाए ।

अमेरिका नपाल पत्रकार संघ (नेजा)ले हरेक दुई/दुई वर्षमा २ लाख २२ हजार २२२ रुपैयाँ राशिको ‘नेजा सामुदायिक ग्रामीण पत्रकारिता पुरस्कार’ नेपाल पत्रकार महासंघको समन्वयमा नेपालमा वितरण गर्दै आएको र भविष्यमा सातवटै प्रदेशमा जनही ५० हजार रुपैयाँ राशिको पुरस्कार हिमालयखबरको पहलमा प्रदान गरिने योजना रहेको जानकारी दिए ।

उनले एकपटकको नेपाली सधैँको नेपाली रहने भएकाले नेपालमा आमा र मातृभूमिको प्रेम प्रवासमा रहेका नेपालीमा रहेको र जीवनको उत्तरार्द्धमा नेपाल नै फर्किने भएकाले फरक सोचले हेर्न नहुने बताए । राज्यले दोहोरो नागरिकता दिने निर्णय गरे पनि कार्यान्वयन कहीँ कतै नभएको बताउँदै राज्यले सहजीकरण गरिदिए स्वदेशमै फर्किने सोच अधिकांश प्रवासी नेपालीको रहेको उनको भनाइ थियो ।

अन्तर्क्रिया कार्यक्रमको समन्वय र सहजीकरण नेपाल पत्रकार महासंघ चितवन शाखाका अध्यक्ष नारायण अधिकारीले गरेका थिए । सो अवसरमा चितवन शाखाले अधिवेशनका क्रममा प्रदान गरेको अग्रज पत्रकार सम्मान पूर्वअध्यक्ष वेदप्रसाद खरेललाई प्रदान गरिएको थियो । कार्यक्रममा अग्रज पत्रकार दीपक आचार्य, ईश्वर जोशी, हिमालयखबरका नेपाल संयोजक केशव भट्टराईलगायतका चितवनका पत्रकार तथा सञ्चारकर्मीहरुको सहभागिता रहेको थियो ।