काठमाडौँ । गैरआवासीय नेपाली संघ (एनआरएनए)को नयाँ नेतृत्व चयनका लागि बिहीबार मतदान हुँदैछ । मंगलबारदेखि सुरू भएको एनआरएनएको ११ औँ महाधिवेशनमा नयाँ पदाधिकारी चयनका लागि मतदान हुन लागेको हो ।

काठमार्डौको सोल्टी होटलमा भइरहेको महाधिवेशनमा बिहीबार बिहान १० बजेदेखि साँझ ६ बजेसम्म मतदान हुँदैछ । विदेशमा रहेका एनआरएनले अनलाइनबाटै मतदान गर्ने व्यवस्था मिलाइएको छ । अनलाइनबाट मतदान गर्नेले बुधबारराति १२ बजेदेखि नै मतदान गरिरहेका छन् । उनीहरुले राति १२ बजेसम्म मतदान गर्न पाउने छन् ।

एनआरएनएको अध्यक्ष पदमा तीन जना उमेदवारबीच प्रतिस्पर्धा हुँदैछ । अध्यक्ष पदका लागि रुसबाट डा. बद्री केसी, जापानबाट महेशकुमार श्रेष्ठ, कतारबाट आरके शर्मा र अमेरिकाबाट रविना थापाले उमेदवारी दर्ता गराएका थिए । तर, अन्तिम समयमा बुधबार साँझ रविना थापाले अर्का उमेदवार महेशकुमार श्रेष्ठलाई समर्थन गर्दै आफ्नो उमेदवारी फिर्ता लिएकी हुन् ।

महासचिवका उमेदवार गौरीराज जोशीले भने, ‘विदेशमा रहनुभएका मतदाताले मतदान गरिरहनुभएको छ । उहाँहरुले आफ्नो विवेक प्रयोग गरिरहनुभएको छ । मैले सबै मतदातासँग फेरि पनि आफ्नो विवेक प्रयोग गरेर सही नेतृत्त्व चयन गर्नुहोस् भन्ने धारणा राखेको छु ।’

४ हजार २२७ मतदाताले एक जना अध्यक्ष, एक महिला र एक युवासहित आठ उपाध्यक्ष, एक महासचिव, ६ सचिव र कोषाध्यक्ष लगायत ७४ जना पदाधिकारी चयन गर्नेछन् । ६ जना उपाध्यक्षका लागि १८ जनाको उमेदवारी रहेको छ ।