अमेरिका । एनआरएनए अमेरिकाको प्रवक्तामा डा. राजन पन्त नियुक्त भएका छन् । आइतवार एनआरएनए अमेरिकाको कार्यसमिति वैठक शुरु हुनु अघिनै अध्यक्ष डा. अर्जुन बञ्जाडेले पन्तलाई प्रवक्ता नियुक्त गरी सपथ समेत गराएको जानकारी गराएका थिए ।

विधान अनुसार प्रवक्ता नियुक्त गर्ने अधिकार अध्यक्षलाई छ । प्रवक्ता एनआरएनए कार्यसमितिको सदस्य सरह हुन्छ । वैठकमा प्रवक्ता कसलाई वनाउने भन्ने विषयमा छलफल भएको थिएन।

कार्यसमितिको वैठकमा अध्यक्षले २७ जना सल्लाहकारको नाम समेत पढेर सुनाएका थिए । तर, सल्लाहकार हुनका लागि सम्वद्ध व्यक्तिको बायोडाटा आवश्यक पर्ने भएकाले त्यस अनुसार नआएकाले आइतवार नियुक्त हुन सकेनन् । सल्लाहकारमा परेकाहरुसँग वायोडाटा लिएर प्रकृया पुर्याएर सबैको छलफल पछि फेरि वोर्डमा लैजाने निर्णय भयो । पाँच जना सल्लाहकार अध्यक्षले नियुक्त गर्न पाउँछन् । तर, यी पनि आफ्नो क्षेत्रमा विशेष दक्षता भएका व्यक्ति हुनुपर्छ ।

बैठकमा चिफ प्याट्रनको पनि निर्णय हुन सकेन । यसका लागि अध्यक्षले सुमन तिमिल्सनाको नाम प्रस्ताव गरेका थिए । उनी एनआरएनए अमेरिकाका संस्थापक अध्यक्ष हुन् । यस्तै अन्य प्याट्रनमा पशुपति पाण्डे, शिव राई र तिलक केसीको नाम पनि प्रस्ताव गरेका थिए ।

वैठकले आईसीसीमा प्रतिनिधित्व गर्ने डेलिगेट छनौट समितिपनि चयन गरेको छ । वरिष्ठ उपाध्यक्ष विकास उप्रेतीको संयोजकत्वमा डेलिगेट छनौट समिति चयन गरिएको छ । यसमा उपाध्यक्ष, महासचिवलाई सदस्यमा राखिएको छ । आवश्यक परे अन्य सदस्य थप गर्ने भन्ने निर्णय भएको छ ।

बैठकले आईसीसीलाई पठाउनु पर्ने रकम पठाउने पनि निर्णय गरेको छ । यसको अधिकार कोषाध्यक्षलाई दिईएको छ । यस्तै निर्वाचन र साधारण सभामा भएको खर्च पनि फरफारक गर्ने निर्णय पनि भएको छ । वैठकमा विभागीय जिम्मेवारी पनि विधानले तोके अनुसार गर्ने निर्णय भएको छ ।

यो पनि पढ्नुहोस्

एनआरएनए अमेरिका अध्यक्षले बैठक पढेका सल्लाहकार प्रस्तावित २७ नाम