मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

राजनीति-समाज   

आगामी पाँच वर्ष सङ्घ र प्रदेशमा गठबन्धन सरकार : मन्त्री भुसाल

आगामी पाँच वर्ष सङ्घ र प्रदेशमा गठबन्धन सरकार : मन्त्री भुसाल


काठमाडौँ । ऊर्जा, जलस्रोत तथा सिँचाइमन्त्री पम्फा भुसालले आसन्न निर्वाचनपछि सङ्घ र सातै प्रदेशमा गठबन्धनको स्थायी सरकार बन्ने दाबी गरेकी छन् । 
 
प्रतिनिधिसभा र प्रदेशसभा सदस्य निर्वाचन २०७९ अन्तर्गत बुधबार ललितपुरका विभिन्न क्षेत्रमा घरदैलो कार्यक्रमपछि गोदावरी नगरपालिका–१२ थेचोमा आयोजित चुनावी कोणसभालाई सम्बोधन गर्दै उनले गठबन्धन सरकारले देशको आर्थिक तथा सामाजिक विकासमा नयाँ क्रान्तिको अभियान थालनी गर्ने बताइन् । 
 
राष्ट्रिय आवश्यकताका आधारमा वर्तमानमा गठबन्धन बनेको उल्लेख गर्दै उनले परिवर्तनका शक्तिको बलियो सम्बन्ध, दायित्व र जिम्मेवारीले बाम–लोकतान्त्रिक गठबन्धन बनेको स्पष्ट पारिन् । “कसैले भ्रम छरेर गठबन्धन टुट्ने छैन”, उनले भनिन्, “गठबन्धनले आगामी पाँच वर्ष सङ्घ र प्रदेशमा स्थायी सरकार दिनेछ ।”
 
आगामी मङ्सिर ४ गते जनताले गठबन्धनको पक्षमा मतदान गरेर संविधानलाई थप बलियो बनाउने उनको भनाइ छ । “जनताले लोकतन्त्र र संविधानलाई बलियो बनाउने छन्”, ललितपुर क्षेत्र नं ३ का उम्मेदवार भुसालले भनिन्, “मुलुकलाई अग्रगति दिँदै अबको पाँच वर्षमा जनताको अपेक्षा पूरा गर्नेछौँ ।” उनले तीनै तहका सरकारको उचित समन्वय र सहकार्यबाट भौतिक पूर्वाधार र आर्थिक विकासलाई अगाडि बढाउने प्रतिबद्धता व्यक्त गरे । 
 
कार्यक्रममा ललितपुर महानगरपालिकाका प्रमुख चिरिबाबु महर्जनले मुलुकमा विकास र समृद्धिको यात्रा अगाडि बढाउन गठबन्धनको जित आवश्यक भएको बताए । उनले गठबन्धनका उम्मेदवार विजयी भए स्थानीय तहमा आफूहरुलाई काम गर्न सहज हुने बताए । “हामीले पाँच वर्षको अवधिमा जुन काम ग¥यौँ, त्यो कामको रफ्तार अझ अभवृद्धि हुनेछ । जनतालाई अझ बढी विकास र सेवाप्रवाहको अनुभूति दिलाउन सकिन्छ”, उनले भने ।
 
स्थानीय तहका कामकारबाहीलाई प्रभावकारी बनाउन सङ्घ र प्रदेश सरकारको सहयोग आवश्यक पर्ने भन्दै उहाँले सङ्घीयतालाई बलियो बनाउने शक्तिलाई निर्वाचनमा विजयी गराउनुपर्ने बताए । “ललितपुर क्षेत्र नं ३ मा गठबन्धनका साझा उम्मेदवारका रुपमा रहेकालाई जनताले विजयी गराउनुपर्छ”, उनले भने, “गठबन्धनका उम्मेदवार विजयी भए मात्र हामीलाई महानगर, नगरपालिकाका सहज ढङ्गबाट काम गर्न सहज हुन्छ ।” रासस