काठमाडौँ । नेपाली कांग्रेसले पार्टीको निर्णयविपरीत बागी उमेदवार बनेका र प्रस्तावक तथा समर्थक भएका ७६ जना नेता कार्यकर्तालाई कारबाही गरेको छ । 

 

आगामी मङ्सिर ४ गते सम्पन्न हुन गइरहेको प्रतिनिधिसभा र प्रदेशसभा सदस्य निर्वाचन, २०७९ मा नेपाली कांग्रेस पार्टीका आधिकारिक उम्मेदवार र पार्टीले समर्थन गरेको उम्मेदवारविरुद्ध उमेदवार भएका र त्यस्ता उमेदवारको प्रस्तावक वा समर्थक भएकालाई कारबाही गरिएको अनुशासन समितिका संयोजक आनन्दप्रसाद ढुङ्गानाले जारी गरेको विज्ञप्तिमा उल्लेख छ ।

 

नेपाली कांग्रेसको विधान २०१७ (संशोधनसहित) को धारा ३४ को उपधारा ४ (क) बमोजिम पाँच वर्षका लागि ती नेता कार्यकर्तालाई कारबाही गरिएको विज्ञप्तिमा उल्लेख छ । ती नेता कार्यकर्तालाई सदस्यतासमेत नरहने गरी पार्टीको अभिलेखबाट हटाउन निर्देश गरिएको छ । 

 

बागी, निजका प्रस्तावक एवं समर्थक र अन्य पार्टीमा गई उमेदवार भएकाको नामावलीसमेत अभिलेखबाट हटाइने पार्टीले जनाएको छ । त्यस्ता नेता, कार्यकर्ताको सूचना तत्काल केन्द्रीय अनुशासन समितिमा पठाइदिनसमेत निर्देश गरिएको संयोजक ढुङ्गानाले बताए ।