न्यूयोर्क । द गुरुङ (तमु) सोसाइटी इन्क, युएसएले पहिलोपटक ३५ वर्ष माथिको उमेर समूहका युवालाई लक्षित गरी आयोजना गरेको गुरुङ युनाइटेड कप भलिबल टुर्नामेन्टको उपाधि म्याग्दी समाज अमेरिकाले हात पारेको छ ।
पहिलो विजेताले १५ सय डलर नगदसहित गुरुङ युनाइटेड कप प्राप्त गरेको भने आयोजक संस्था द गुरुङ तमु सोसाइटीको टिम गुरुङ युनाइटेडले दोस्रो विजेताको स्थान हासिल गरेको छ । दोस्रो विजेता गुरुङ युनाइटेडले कपसहित एक हजार डलर नगद प्राप्त गरेको छ ।
टुर्नामेन्टमा आयोजकसहित आठ वटा टिम सहभागी भएका थिए । आयोजकसहित रिजउड नेपाल समाज, हेर्पा किदुग युएसए, म्याग्दी समाज अमेरिका, मगर संघ अमेरिका, किरात राई सोसायटी अफ अमेरिका, एनवाइसी क्लब तथा रेड पाण्डाले प्रतिष्पर्धामा भाग लिएका थिए ।
आठ समूहबीच विभिन्न चरणमा भएको प्रतियोगिताको फाइनल खेल दोसे विजेता गुरुङ युनाइटेड र उपाधि विजेता म्याग्दी समाज अमेरिकाबीच प्रतिष्पर्धा भएको थियो ।
त्यस्तै, खेलमा सोम बुढाथोकी सर्वश्रेष्ठ खेलाडी, श्री गुरुङ सर्वश्रेष्ठ स्पाइकर, गोविन्द रोका क्षेत्री सर्वश्रेष्ठ डिफेन्डर र हरिप्रसाद राणा सर्वश्रेष्ठ रेजर भएका छन् । समाजले गएको वर्ष पनि हर्क गुरुङ भलिबल कप आयोजना गरेको थियो ।
द गुरुङ तमु सोसाइटीका अध्यक्ष तोरण गुरुङले स्वास्थ्य नै जीवन हो र स्वस्थ जीवनका लागि खेल महत्त्वपूर्ण भएकोले खेलको माध्यमबाट युवाहरुलाई स्वस्थ रहनुपर्छ तर त्यसको लागि नियमितरुपमा अभ्यास गर्नु आवश्यक छ भन्ने सन्देश दिनका लागि गुरुङ युनाइटेड कपको आयोजना गरेको बताए ।
त्यस्तै गुरुङ युनाइटेड कपका संयोजक तथा द गुरुङ तमु सोसाइटीका खेल व्यवस्थापक तथा अञ्जित गुरुङले यस्ता प्रतियोगिताका माध्यमबाट विभिन्न समुदायका युवाहरुबीच आपसी सद्भाव र भाइचारा कायम गर्न यस्ता प्रतियोगिता गरिएको जानकारी दिए ।
सोसाइटीका सचिव अलिशा गुरुङले कार्यक्रम सफल बनाउनका लागि सल्लाहकार, आजीवन सदस्यहरु, सल्लाहकारहरु, कार्यसमितिका पदाधिकारीहरु, समाजका सदस्यहरुलगायत विभिन्न व्यापारिक संस्थाले आर्थिक तथा भौतिक सहयोग गरेको जानकरी दिँदै सबैलाई धन्यवाद दिए ।
यसैगरी गुरुङ (तमु) सोसाइटी चेलीबेटी आमा समूहका दिदीबहिनीहरूले खेलाडीहरुका लागि खानाको व्यवस्थापन गरेको उल्लेख गर्दै चेलीबेटी आमा समुहलाई सहयोगका लागि धन्यवाद व्यक्त गरिन् ।
कार्यक्रममा कलाकारहरु रूथमान गुरुङ र एन्सार्ज गुरुङले नृत्य प्रस्तुत गरेका थिए । आयोजकले कार्यक्रम संयोजक, खेलाडी तथा सहभागी टिमका सम्पूर्ण खेलाडीहरुलगायत सहभागी सबैलाई धन्यवाद व्यक्त गरे ।
प्रतिक्रिया