भरतपुर । देशकै सर्वाधिक चासोको विषय बनेको चितवनको भरतपुर महानगरपालिकाको मेयरमा नेकपा माओवादी केन्द्रकी उमेदवार रेनु दाहालले अग्रता लिएकी छन् । सोमबार बेलुकीसम्म १६ हजार ३३ मत गणना गर्दा रेनु एमालेका उमेदवार विजय सुवेदीभन्दा १७ मतले अग्रता लिएका हुन् ।

 

बेलुकी १० बजेसम्मको सार्वजनिक मत परिणामअनुसार दाहालले ५३५० मत पाएकी छिन् । उनका निकटतम प्रतिस्पर्धी उमेदवार विजय सुवेदीले ५३३३ मत पाएकी छन् । सोमबार दिउँसोसम्म विजय सुवेदी झिनो मतले अगाडि रहेकोमा बेलुकीदेखि दाहालले मतान्तर घटाउँदै अग्रता कायम गरेकी हुन् । यस्तै, स्वतन्त्र उमेदवार जगन्नाथ पौडेलले २५५८ मत पाएका छन् ।

 

यस्तै, उपमेयरमा नेपाली कांग्रेसका चित्रसेन अधिकारीले ६४५२ मतका साथ अग्रस्थानमा छन् । दोस्रो स्थानमा रहेकी राप्रपा उमेदवार हिमला गुरूङले ४३२१ मत पाएकी छन् ।

 

भरतपुरमा नेपाली कांग्रेस, नेकपा (माओवादी केन्द्र), नेकपा (एकीकृत समाजवादी), जनता समाजवादी पार्टी र राष्ट्रिय जनमोर्चाको समर्थन माओवादी उमेदवार रेनु दाहाललाई रहेको छ भने नेकपा एमालेका उमेदवार सुवेदीलाई राप्रपाको समर्थन प्राप्त छ ।

 

कुल २९ वटा वडा रहेको भरतपुरको वडा नं १ बाट गणना कार्य सुरू गरिएको थियो । भरतपुर महानगरपालिकामा रहेका कुल एक लाख ८५ हजार ७५२ मतदातामध्ये ६७ प्रतिशत अर्थात् एक लाख २५ हजार ५५० मत खसेको छ ।