काठमाडौँ । नेपालमा कोरोना भाइरसको नयाँ भेरियन्ट ओमिक्रोन संक्रमण पुष्टि भएको छ । सोमबार स्वास्थ्य मन्त्रालयद्वारा आयोजित पत्रकार सम्मेलनमा सहप्रवक्ता समीरकुमार अधिकारीले दिएको जानकारीअनुसार नेपालमा पनि ओमिक्रोन संक्रमण पुष्टि भएको हो । 

 

स्वास्थ्य मन्त्रालयका अनुसार दक्षिण अफ्रिकाबाट आएका दुई जनाको नमुना संकलन गरेर जिन स्क्रिनिङ गर्दा ओमिक्रोन ​भेरियन्टको सङ्क्रमण भेटिएको हो । ६६ वर्षीय विदेशी नागरिक र उनको सम्पर्कमा आएका ७१ वर्षीय नेपाली नागरिकमा मंसिर १९ गते ओमिक्रोन भेरियन्ट देखिएको हो । 

 

यसअघि दुवै जनाले कोरोना भाइरसविरूद्धको खोपसमेत लगाएका थिए । गत मंसिर ३ गते नयाँ भेरियन्ट देखिएको दक्षिण अफ्रिका हुँदै ६६ वर्षीय विदेशी नागरिक त्रिभुवन अन्तर्राष्ट्रिय विमानस्थल हुँदै नेपाल प्रवेश गरेका थिए । उनीहरु नेपाल आउँदा नियमानुसार पिसिआर रिपोर्ट नेगेटिभ तथा कोरोना खोपको डोज पूरा गरेको पाइएको मन्त्रालयले जनाएको छ । 

 

उनीहरुमा कोभिड १९ सँग मिल्दाजुल्दो लक्षण देखिएपछि राष्ट्रिय जनस्वास्थ्य प्रयोगशाला टेकुमा जिन स्विकन्सिङ विधिबाट परीक्षण गरिएकोमा मंसिर १९ गते ओमिक्रोन भेरियन्ट नेपालमा पनि पहिलोपटक पुष्टि भएको मन्त्रालयका सहप्रवक्ता अधिकारीले बताए ।

 

सहप्रवक्ता अधिकारीका अनुसार विदेशबाट आएका दुई जनालाई शंका लागेर परीक्षण गर्न राष्ट्रिय जनस्वास्थ्य प्रयोगशाला टेकुमा पठाएकोमा मंसिर १९ गते राति ओमिक्रोन भेरियन्टको संक्रमण पुष्टि भएको हो । अहिले दुवैको स्वास्थ्य अवस्था सामान्य रहेको र उनीहरुमा कुनै लक्षणहरु देखिएको छैन । उनीहरु दुवै जनालाई स्वास्थ्यकर्मीहरुको निगरानीमा राखिएको छ । 

 

अहिले दुवै जना सरकारले तोकेको मापदण्डअनुसार आइसोलेसनमा रहेका छन् । उनीहरुको सम्पर्कमा आएका ६६ जनाको कन्ट्याक्ट ट्रेसिङ गर्दा सबैको नतिजा नेगेटिभ आएको र सबै स्वस्थ रहेको सहप्रवक्ता अधिकारीको भनाइ छ । 

 

स्मरण रहोस् २०२१ नोभेम्बर २४ मा दक्षिण अफ्रिकामा कोरोनाको उत्परिवर्तित भाइरस ओमिक्रोन पहिलोपटक पहिचान भएको थियो । यो भेरियन्ट अहिलेसम्म ३६ देशमा देखापरिसकेको छ । विश्व स्वास्थ्य संगठनले अहिले लगाइँदै आएको कोरोना भाइरसविरुद्धको खोपको प्रभावकारिता ओमिक्रोनमा रहे नरहेको अध्ययन गरिसकेको छ । वैज्ञानिकअरुले यो भाइरस सर्ने दर र संक्रमणबाट हुने स्वास्थ्य जटिलताका बारेमा पनि अध्ययन गरिरहेका छन् । 

 

विश्व स्वास्थ्य संगठनले दक्षिण पूर्वी एसियामा ओमिक्रोनको उच्च जोखिम रहेको भन्दै सतर्कता अपनाउन र स्वास्थ्य मापदण्ड कायमै राख्न आह्वान् गरेको छ । भारतमा २१ जनासहित दक्षिण एसियाका अन्य देशहरुमा पनि ओमिक्रोन भेरियन्ट पुष्टि भइसकेको छ ।