अमेरिका – गैर आवासीय नेपाली संघ (एनआरएन) अमेरिकाको निर्वाचनमा एउटा डिभाइसबाट अधिकतम चारजना भन्दा बढीले मतदान गर्न नपाउने वैधानिक व्यबस्था कार्यान्वयन हुन नसक्ने निर्वाचन आयोगले स्पष्ट पारेको छ । 

 

एनआरएन अमेरिकाको विधानको धारा ११६ (बी) मा एउटा डिभाइसबाट बढीमा चारजनाले मात्र मतदान गर्न पाउने प्रावधान छ । डिभाइस भन्नाले कम्युटर/ट्याबलेट/स्मार्टफोन भन्ने बुझ्नुपर्छ । जसबाट अनलाइन मतदान गर्न सकिन्छ । 

 

‘व्यक्तिको गोपनियताको विषय परेको र व्यापक रुपमा कानुनी सल्लाह लिँदा डिभाइस ट्र्याक गर्न कानुनी रुपमा नमिल्ने भएकोले त्यो गर्न नसकिने जानकारी हामीले एनआरएनए अमेरिकाको बोर्डलाई जानकारी गराइसकेका छौं’ प्रमुख निर्वाचन आयुक्त विश्व बरालले भने । विधानमा व्यबस्था भएको यो नीति कार्यान्वयन गर्नका लागि निर्वाचन समितिले आइटी कम्पनीहरुसँग आशयपत्र माग गरेकोमा गैर कानुनी भएकोले कसैले पनि प्रस्ताव पेश नगरेको समेत उनले बताए । 

 

कसैको पनि प्रस्ताव नपरेको र कानुनी विज्ञहरुसँग सल्लाह गर्दा गर्न नहुने ठहर भएकोले डिभाइस ट्र्याक गर्ने कार्य नहुने समेत बरालले जानकारी दिए । विधानमा व्यबस्था भएको प्रावधान कार्यान्वयन नहुँदा अब एउटा डिभाइसबाट जति जनाले पनि मतदान गर्न सक्नेछन् ।

 

‘निर्वाचनको धाँधली रोक्न एउटा डिभाइसबाट चारजना भन्दा बढीले मतदान गर्न नपाउने वैधानिक व्यबस्था छ । अझ पूर्ण रुपमा धाँधली रोक्ने हो भने एक डिभाइस एक मताधिकार हुनुपर्छ’ एनआरएन अमेरिकाका अध्यक्षका उम्मेदवार तिलक केसीले भने । तर आफ्नो भनाईको कतैबाट पनि सुनुवाइ नभएको गुनासो केसीले गरेका छन् ।

 

विधान अनुसार गर्न नसकिने भएपछि सो दफालाई संशोधन गर्नुपर्ने बरालले बताए । ‘यो विषयलाई आउँदो साधारण सभामा पेश गर्नुपर्ने देखिन्छ’ उनले भने । एउटा डिभाइसबाट जति पनि मतदान गर्न पाइने भएपछि आसन्न एनआरएन निर्वाचनमा एकै होटलमा बसेर मतदान केन्द्र जस्तो बनाएर मतदान हुने संभावना बढेको छ ।