पेरिस । विश्वभर महामारीका रुपमा फैलिएको कोरोनाभाइरस (कोभिड–१९) को सङ्क्रमणबाट मृत्यु हुनेको संख्या १० लाख २८ हजार ७०१ पुगेको छ ।  

जोन्स हप्किन्स विश्वविद्यालयका अनुसार कोभिड–१९ बाट सङक्रमित हुनेको संख्या विश्वभर तीन करोड ४५ लाख ४८ हजार ५६२ पुगेको छ । कुल सङ्क्रमितमध्ये दुई करोड ५७ लाख ७ हजार ६९३ निको भएका छन् भने करिब ७८ लाख १२ हजार १६८ मानिस सक्रिय सङ्क्रमित छन् । 

विश्वभर अझै पनि ६६ हजार ९२ मानिसको स्वास्थ्य अवस्था निकै जटिल रहेको छ । पेशा व्यवसाय खोल्ने वा नखोल्ने भन्ने विषयमा दोधारमा रहेको संयुक्तराज्य अमेरिकामा सबैभन्दा बढी मानिसको मृत्यु भएको छ भने यहाँ सङ्क्रमितको संख्या पनि ७५ लाख पुगेको छ ।  कोरोना सङक्रमणबाट अमेरिकामा हालसम्म दुई लाख १२ हजार ७२६ को मृत्यु भएको छ । 

अमेरिकी राष्ट्रपति डोनाल्ड ट्रम्प र प्रथम महिला मेलानिया ट्रम्प दुवैलाई कोरोना भाइरस संक्रमण भएको छ । ट्रम्पले बिहीबार ट्वीट गर्दै भने, “म र प्रथम महिला दुवै कोभिड–१९ बाट संक्रमित भएका छौं । हामी दुवै क्वारेन्टिनमा छौँ । 

विश्वकै दोस्रो ठूलो जनसंख्या रहेको भारतमा ६४ लाख सङ्क्रमित भएका छन् भने यहाँ ९९ हजार ८३७ को  ज्यान गइसकेको छ । त्यस्तै ब्राजिलमा ४८ लाख ९७ हजार भन्दा बढी व्यक्ति सङ्क्रमित भएकामा एक लाख ४४ हजार ७७६ को मृत्यु भएको छ । 

खोप विकास गरिसकेको घोषणा गरेको रसियामा ११ लाख ९४ हजार ६४३ सङ्क्रमित रहेका छन् भने २१ हजार ७७ जनाको मृत्यु भएको छ भने दैनिक संक्रमितको संख्या पनि बढ्दो छ । दक्षिण अमेरिकी राष्ट्र अर्जेन्टिनामा २४ घन्टामा कोरोना भाइरसको सङ्क्रमणबाट ३ हजार ३५२ जनाको मृत्यु भएको छ ।

युरोपेली मुलुकहरु खासगरी बेलायत, फ्रान्स, स्पेन र इटालीमा कोरोनाभाइरस संक्रमणको दोस्रो लहर सुरु भएको आँकलन गर्दै सार्वजनिक जनजीवनमा धेरै किसिमका प्रतिबन्धहरुको घोषणा गर्न थालिएको छ ।