रियो दि जेनेरियो । कोरोना भाइरसबाट विश्वभर संक्रमित हुनेको संख्या ६० लाख ८५ हजार ९९४ पुगेको प्रभावित मुलुकहरूका स्वास्थ्य मन्त्रालय तथा सम्वद्ध संस्थाहरूले उपलब्ध गराएको तथ्याङ्कमा उल्लेख गरिएको छ ।
अमेरिकाको जोन हकिन्स विश्वविद्यालयका अनुसार शनिबारसम्म मृत्यु हुनेको सङ्ख्या तीन लाख ६८ हजार ४४७ भन्दा बढी पुगेको जनाएको छ ।
अमेरिकामा कोरोनाभाइरस सङ्क्रमण पुष्टि हुनेको सङ्ख्या १८ लाख २ हजार ८६ रहेको छ भने एक लाख चार हजार ७८३ सङ्क्रमित अमेरिकीको अहिलेसम्म मृत्यु भएको छ । अमेरिकामा व्यक्तिको उपचारपछि निको हुने सङ्क्रमित व्यक्तिको सङ्ख्या पाँच लाख २० हजार ९२८ पुगेको छ ।
अहिलेसम्म कोरोना भाइरसका कारण सबैभन्दा धेरै मृत्यु अमेरिकामा भएको छ भने त्यसपछि क्रमशः बेलायत, इटली, फ्रान्स र ब्राजिल रहेका छन् ।
बढी प्रभावित दक्षिण एसियाली मुलुकमा धेरै सङ्क्रमितको सङ्ख्या भारतमा रहेको छ । पाकिस्तान, बङ्गलादेश, अफगानिस्तान, नेपाललगायतका मुलुकमा पनि पछिल्ला दिनहरूमा सङ्क्रमितको सङ्ख्या बढ्दो क्रममा रहेको छ ।
भारतमा सङ्क्रमितको सङ्ख्या एक लाख ८१ हजार १४५ पुगेको छ भने पाकिस्तानमा ६६ हजार ४५७, बङ्गलादेशमा ४४ हजार ६०८ र अफगानिस्तानमा १४ हजार ५२५ सङ्क्रमित रहेका छन् ।
नेपालमा शनिबारसम्म सङ्क्रमितको सङ्ख्या एक हजार ४०१ पुगेको छ भने हालसम्म ७ जनाको मृत्यु भएको छ । ब्राजिलमा विगत २४ घन्टामा ११८० सङ्क्रमितको मृत्यु भएको छ ।
विश्वव्यापी महामारीबाट बढी प्रभावित मुलुकहरूमध्ये ब्राजिल पाँचौ स्थानमा परेको छ । कोरोनाभाइरस सङ्क्रमणका विगत २४ घन्टाको समयमा मृत्यु हुनेको सङ्ख्या ११८० पुगेको ब्राजिलको स्वास्थ्य मन्त्रालयले शनिबार जानकारी गराएको छ ।
ब्राजिलमा शनिबार रातिसम्म २७ हजार ९४४ कोरोना सङ्क्रमित व्यक्तिको मृत्यु भएको मन्त्रालयले जानकारी गराएको छ ।
शनिबारसम्ममा ब्राजिलमा कोभिड–१९ सङ्क्रमण पुष्टि भएका व्यक्तिहरूको सङ्ख्या चार लाख ६८ हजार ३३८ पुगेको मन्त्रालयद्वारा जारी विज्ञप्तिमा उल्लेख छ ।
पछिल्लो २४ घन्टामा ब्राजिलमा कुल २९ हजार ५२६ व्यक्तिमा कोरोनाभाइरस सङ्क्रमणको पुष्टि भएको छ ।
दक्षिण अमेरिकी मुलुक ब्राजिलमा सबैभन्दा बढी साओपाओलामा एक लाख व्यक्ति सङ्क्रमित भेटिएका छन् भने करिब सात हजार ३०० सङ्क्रमित व्यक्तिको मृत्यु भएको छ । त्यसपछि बढी प्रभावित स्थानहरूमा रियो दि जेनेरियो, सिएरालगायतका सहर रहेका छन् । एएनआई
प्रतिक्रिया