नयाँ दिल्ली । भारतमा कोरोना भाइरस (कोभिड-१९) बाट शुक्रबार मध्यान्हसम्म ज्यान गुमाउनेको संख्या एक हजार १५४ पुगेको छ । भारतको स्वास्थ्य मन्त्रालयको तथ्यांकअनुसार पछिल्लो २४ घन्टामा भारतमा ज्यान गुमाउनेको संख्या ७५ नाघेको हो ।

 

भारतमा कोरोना भाइरसबाट कुल संक्रमितको संख्या ३५ हजार पुगेको छ । पछिल्लो २४ घन्टामा भारतमा कोरोना भाइरसका एक हजार ९९३ नयाँ संक्रमित फेला परेका छन् । यससँगै समग्र संक्रमितको संख्या ३५ हजार ४३ पुगेको छ ।

 

भारतको सबैभन्दा प्रभावित राज्य महाराष्ट्रमा हालसम्म कोरोना भाइरसको कारण करिब १० हजार ५०० संक्रमित भइसकेका छन् भने ४५९ पुगेको छ । त्यस्तै, गुजरातमा चार हजार ३०० भन्दा बढी संक्रमित फेला परिसकेका छन् भने २१४ जनाको मृत्यु भइसकेको छ ।

 

मध्य प्रदेशमा पनि दुई हजार ६०० भन्दा बढीमा कोरोना भाइरसको संक्रमण देखिँदा १३७ जनाको मृत्यु भइसकेको छ । उत्तर प्रदेशमा अहिलेसम्म दुई हजार २०३ जनामा संक्रमण देखिँदा ३९ जनाको मृत्यु भइसकेको छ । 

 

पश्चिम बंगालमा पनि सात सय ९५ जनामा कोरोना भाइरसको संक्रमण देखिएको छ भने ३३ जनाको मृत्यु भइसकेको छ ।

 

बिहारमा अहिलेसम्म ४१८ जना मानिसमा कोरोना भाइरसको संक्रमण पुष्टि भइसकेको छ भने दुईजनाको मृत्यु भएको छ । हालसम्म भारतमा नौ हजार ६८ संक्रमित उपचारपश्चात् घर फर्किसकेका छन् ।

 

भारतमा आगामी आइतबार अर्थात् मे ३ सम्म लकडाउन घोषणा गरिएको छ ।