हिमालयखवर संवाददाता
अमेरिका- अमेरिकी राजनीतिका चर्चित पूर्व राष्ट्रपति उम्मेदवार तथा सिनेटर जोन म्याकिनको शनिवार निधन भएको छ । ब्रेन क्यान्सर पीडित म्याकिन ८१ वर्षका थिए । सकृय क्यान्सरको नियन्त्रण नभएपछि उनको केही दिन यता औषधी उपचार गर्न बन्द गरिएको थियो ।
सत्तारुढ रिपब्लिकन पार्टीका सिनेटर म्याकिन राष्ट्रपति डोनाल्ड ट्रम्पको नीतिका विरोधमा थिए । दुई पटक राष्ट्रपति उम्मेदवार भए पनि उनी विश्वकै सर्वोच्च पदमा पुग्न भने सफल हुन सकेनन् । आठबर्ष अघि राष्ट्रपति बाराक ओबामासंग उनी पराजित भएका थिए ।
अमेरिकी हवाई सेनाका पूर्व पाइलट, भियतनाम युद्धवन्दी म्याकिन जहाज दुर्धटना हुदांपनि बाँचेका थिए । एरिजोनावाट सिनेटर भएका म्याकिन गत वर्षको अन्तिमसम्म राजनीतिमा सकृय थिए ।
रोगले च्याप्दै गएपछि उनले केही साता यताका दिनहरू भने एरिजोना स्थित आफ्नो निवासमा परिवार र निकट मित्रसँग बिताएका थिए । गत डिसेम्बर यता उनी वासिंटन जान कम गरेका थिए ।
उनको परिवारले केही महिना देखिनै उनको अन्तिम संस्कारको तयारी गरेको थियो । अन्तिम संस्कारमा राष्ट्रपति ट्रम्पलाई भने निमन्त्रणा नगरिने परिवारले पहिलेनै घोषणा गरिसकेको थियो ।
अनुदारवादी सोच भए पनि म्याकिन अमेरिकी राजनीतिका वरिष्ठ र परिपक्क राजनेता थिए ।
उनको ब्रेनमा क्यान्सर देखिएपछि सन् २०१७ जुलाईमा सर्जरी गरिएको थियो । तर, उनमा लागेको क्यान्सर सकृय देखिएकाले आधुनिक उपचारले पनि बचाउन सकेन । शनिवार उनले अन्तिम सास लिई अमेरिकी राजनीतिमा इतिहास बनाएर बिदा भए ।
प्रतिक्रिया