काठमाडौं । चितवन निकुञ्जको सार्वजनिक वन अतिक्रमण गरेको अभियोगमा प्रक्राउ परेका स्वामी कमलनयनाचार्यका सहयोगी कृष्णप्रपन्नाचार्य गृहमन्त्री बामदेव गौतमको ठाडो आदेशमा रिहा भएका छन् । प्रहरी उच्च स्रोतका अनुसार गृहमन्त्री गौतमले संविधानसभा परिसरबाटै आइजीपी उपेन्द्रकान्त अर्याललाई फोन गरेर स्वामीका सहयोगी छाड्न निर्देशन दिएका थिए । 

 

२५ विगाह वन क्षेत्र अतिक्रमण गरेको अभियोगमा चितवन प्रहरीले स्वामीका सहायक कृष्णप्रपन्नाचार्यलाई प्रक्राउ गरेको थियो । तर, पक्राउ परेको तीन दिनमै उनलाई ‘हाजिर जमानी’ मा चितवन प्रहरीले छाडेको होे । स्रोतका अनुसार गृहमन्त्री गौतमले आइजीपी अर्याललाई निर्देशन दिएपछि उनको रिहाई सम्भव भएको हो । चितवन प्रहरी कार्यलय स्रोतले ‘माथिको दवावमा’ स्वामीका सहायक प्रपन्नाचार्यलाई ‘हाजिर जमानी’ मा छाडिएको पुष्टि गरेको छ । 

 

प्रपन्नाचार्य छुटाउन सभासद् वाग्लेको जमानत 

स्वामीका सहायक प्रपन्नाचार्यलाई ‘हाजिर जमानी’ मा छुटाउन कांग्रेस सभासद् गीता वाग्ले जमानत बसेकी छिन् । स्वामी सहायक प्रपन्नाचार्य कृष्णबनभित्र बनाइएको गजेन्द्रमोक्षधामका अध्यक्ष हुन् भने कांग्रेस सभासद् गीता धामको संरक्षक छिन् । उनलाई स्वामी कमलनयनाचार्यले आफ्नो उत्तराधिकारीको जिम्मा दिएका छन् । 

 

नियमअनुसार राष्ट्रिय निकुन्ज तथा वन्यजन्तु संरक्षण ऐन, २०२९ अनुसार निकुन्ज क्षेत्रका वन, बन्यजन्तु मासेको, मारेको जा ओसारपसार गरेको मुद्धाको फैसला वार्डेनले गर्न पाउँछन् । कुनै अभियुक्त प्रक्राउ परेलगत्तै अनुसन्धान अधिकृत तोकिएको हुन्छ । ती अधिकृतले २४ दिनभित्र प्रतिवेदन दिएपछि प्रक्राउ परेका व्यक्ति छाड्ने वा पुर्पक्षका लागि थुन्ने भन्ने निर्णय लिने नियम छ । तर, स्वामीका सहायक भने तीन दिनमै जमानीमा रिहा भएका छन् ।

 

यसका पछाडि गृहमन्त्री गौतमको दवाव नै मुख्य कारण रहेको स्रोत बताउँछ । गृहमन्त्रीको दबाबमा निकुन्जका प्रमुख संरक्षण अधिृकत ९वार्डेन० कमलजंग कुँवर परेको स्रोत बताउँछ । कुँवरले भने– ‘म मुद्धा हेर्ने अधिकारी हुँ । यस विषयमा प्रतिक्रिया दिन मिल्दैन ।'