टेक्सस (अमेरिका) । गैर कानुनी मार्गबाट अमेरिका प्रवेश गरेका एक नेपालीको अमेरिकी अध्यागमनको हिरासतमा निधन भएको छ ।
निधन हुनेमा सिन्धुपाल्चोक बाह्रबिसेका सुवास श्रेष्ठ हुन् । उनी मेक्सिको हुँदै एरिजोनाको लुकभील नाका नजिकबाट अवैध रुपमा अमेरिका प्रवेश गरेका थिए । उनलाई इमिग्रेसन एण्ड कस्टम इन्फोर्समेन्ट (आइस) का अधिकारीहरुले पक्राउ गरेका थिए ।
बिना भिसा गैर कानुनी रुपमा अमेरिका प्रवेश गरेका कारण उनलाई देश निकाला गर्ने निर्णय सहित सेप्टेम्बर ९ देखि टेक्ससको कार्नेस काउन्टी इमिग्रेसन प्रोसेसिङ्ग सेन्टरमा राखिएको थियो । उनलाई नेपाल फिर्ता गर्ने तयारी भैरहेको समयमा नोभेम्बर १३ मा हिरासतभित्रै मृत अवस्थामा फेला पारिएको आइसले विज्ञप्ती मार्फत जनाएको छ ।
आइसका अनुसार मृतक श्रेष्ठ ३४ बर्षका थिए । उनको मृत्युको सम्बन्धमा वासिङ्गटन डिसी स्थित नेपाली दूतावासलाई जानकारी गराइसकिएको समेत विज्ञप्तीमा जनाइएको छ ।

स्रोतका अनुसार मृतक श्रेष्ठ ८५ लाख रुपैयाँ खर्च गरेर बिभिन्न देश हुँदै मेक्सिकोबाट अवैध रुपमा मेक्सिको छिरेका थिए । गैर कानुनी रुपमा सीमा नाघेर पस्नेलाई अमेरिकाको आइसले पक्राउ गरेर संबन्धित देश फिर्ता गर्दै आएको छ । सन् २०२२ मा त्यसरी आइसले पक्राउ गरेर २८ नेपालीलाई फिर्ता गरेको थियो। सन् २०२१ मा २३ नेपालीलाई पक्राउ गरेर फिर्ता गरेको थियो भने २०२० मा ९७ जनालाई गरेको थियो ।
सन् २०२२ मा गैर कानुनी रुपमा सीमा पार गरेर अमेरिका पसेका बिभिन्न देशका ७२ हजार एकसय ७७ जनालाई आइसले पक्राउ गरेर अमेरिकाबाट निकाला गरेको थियो ।
नियमित स्वास्थ सेवा, अत्यन्तै निगरानीबीच अध्यागमनको हिरासतमा राखिन्छ । यस्तो अवस्थामा श्रेष्ठको निधन कसरी भयो भन्ने बारेमा आइसले वृस्तृतमा केही उल्लेख गरेको छैन ।
पछिल्लो समयमा ठूलो रकम दलाललाई तिरेर नेपालीहरु दक्षिण अमेरिका हुँदै संयुक्त राज्य अमेरिका प्रवेश गरिरहेका छन् । मेक्सिकोसँग सिमाना जोडिएको अमेरिकी राज्य टेक्ससले गैर कानुनी आप्रवासीको प्रवेश रोक्न फलामे पर्खाल निर्माण गर्नुका साथै व्यापक रुपमा सुरक्षाकर्मीहरु परिचालन गर्न सुरु गरेको छ । टेक्ससको कडा नीतिका कारण आप्रवासीहरु एरिजोना र क्यालिफोर्निया बाट प्रवेश गर्न थालेका छन् । तर आइसले निकै कडाई गरेका कारण आप्रवासीहरु पक्राउ परेर अमेरिका निकाला हुँदै आएका छन् ।