काठमाडौँ । गैरआवासीय नेपाली संघ (एनआरएनए)को कार्यालयमा पत्रकारमाथि कुटपिटका साथै समानान्तर कार्यसमितिका अध्यक्ष आरके शर्मालगायतमाथि दुर्व्यवहारमा संलग्न रहेको आरोपमा प्रहरीले एक जनालाई पक्राउ गरेको छ ।

पक्राउ पर्नेमा उदयपुर घर भएका युवा संघका कार्यकर्ता दीपेन्द्र तामाङ रहेका छन् । उनलाई बिहीबार राजधानीको गौरीघाटबाट पक्राउ गरिएको जिल्ला प्रहरी परिसर काठमाडौँका एसपी कुमोध ढुंगेलले जानकारी दिए ।

मंगलबार युवा संघका कार्यकर्ताले बालुवाटारस्थित संघको कार्यालयमा बेल्जियम निवासी पत्रकार तथा एनआरएनए अभियन्ता ओम शर्मामाथि आक्रमण गरेका थिए । सो घटनाको अनुसन्धानका संघको कार्यालयमा रहेको सिसिटिभी फुटेज मगाएर अनुसन्धान गर्दा उनको संलग्नता देखिएको प्रहरीको भनाइ छ ।

यस्तै, सोही घटनामा एनआरएनएका अध्यक्ष आरके शर्मा, महासचिव बुद्धि सुवेदीलगायतमाथि पनि दुर्व्यवहार भएको थियो । सो घटनापछि पीडित ओम शर्माले उजुरी दिएका थिए । यस्तै आरके शर्माले पनि अर्को छुट्टै उजुरी दिएका थिए ।

संघको कार्यालयमा निर्वाचित अध्यक्ष बद्री केसीले युवासंघलाई बोलाएर कार्यक्रम राखेको भन्दै आरके शर्मालगायतले विरोध गरेपछि दुई पक्षीय विवादका क्रममा आक्रमण भएको बताइएको छ ।

एमाले नेता महेश बस्नेत समेत सहभागी कार्यक्रममा भएको यो घटनापछि केसीले पनि प्रहरी वृत्त दरबारमार्गमा शान्तिसुरक्षाको माग गर्दै उजुरी दिएका थिए । ११ औँ महाधिवेशनमा धाँधली गरेर बद्री केसीले चुनाव जितेको आरके पक्षले आरोप लगाएपछि एनआरएनएमा दुई पक्षीय विवाद चर्किएको छ ।