अमेरिका । अमेरिकामा सक्रिय संगठन प्रवासी नेपाली एकता मञ्च अमेरिकाले नेपालका विभिन्न स्थानमा सहयोग गरेको छ । 

 

मञ्चले हिकारू गौतम फाउन्डेसनमार्फत रामेछापको दोरम्बा गाउँपालिकाको स्वास्थ्यचौकीमा दुई थान एसी जडान गर्नुको अलावा सुनापति गाउँपालिकाको १ र २ नम्बर वडामा अक्सिजन कन्सनट्रेटरसमेत प्रदान गरको छ । 

 

प्रवासी नेपाली एकता मञ्च अमेरिकाकी नेतृ सरिता चौलागाईंका स्वर्गीय सुपुत्र हिकारू गौतमको सम्झना र सम्मानमा फाउन्डेसन स्थापना गरी विभिन्न सामाजिक काम गर्दै आएको छ । प्रवासी नेपाली एकता मञ्च अमेरिकाले कोरोना महामारीको बेला अमेरिकाका विभिन्न स्थानहरुमा नेपाली समुदायहरुलाई खाद्यान्न र औषधि वितरण गरेको थियो । साथै नेपालका रौतहटलगायतका जिल्लाहरुमा सहायता प्रदान गरिसकेको छ । 

 

केही समयअगाडि मात्रै पनि हिकारू गौतमको जन्मदिन पारेर हिकारू फाउन्डेसनले प्रवासी मञ्चसँगको सहकार्यमा बारा जिल्लाको निजगढ गाउँपालिकाका गरिब तथा जेहेन्दार विद्यार्थीहरुलाई साइकल तथा नगद समेत हस्तान्तरण गरेको थियो । 

 

रामेछापमा स्वास्थ्य सामग्री तथा उपकरण हस्तान्तरण गर्न हिकारु फाउन्डेसनका अध्यक्ष, हिकारू गौतमका हजुरबुवा, पुर्व मन्त्री एवं बामपन्थी नेता कमल चौलागाईंद्वारा गरिएको थियो । 

 

सो अवसरमा स्थानीय जनप्रतिनिधिहरु सहित जनसमुदायको सहभागिता रहेको थियो । हिकारू गौतम फाउन्डेसनलाई सहयोग गर्ने क्रममा प्रवासी नेपाली एकता मञ्च अमेरिकाका अध्यक्ष टेक गुरुङलगायतको टिमले भूमिका खेलेको जनाइएको छ । 

 

साथ र सहयोगको लागि फाउन्डेसनका अध्यक्ष कमल चौलागाईंले हार्दिक आभार व्यक्त गरेका थिए । प्रवासी नेपाली एकता मंचका अध्यक्ष टेक गुरुङले आफ्नो संस्थाको सहयोगको सही उपयोग गरेकोमा फाउन्डेसनलाई धन्यवाद दिएका थिए ।