चितवन । नेपाल प्रेस युनियन चितवनले चैत २५ गते हुन गइरहेको पत्रकार महासंघ चितवनको चुनावका लागि उमेदवार घोषणा गरेको छ । 

आइतबार बसेको प्रेस युनियन चितवनको भेलाले प्रेस युनियन चितवनका निवर्तमान अध्यक्ष नारायणप्रसाद अधिकारीलाई महासंघ चितवनको अध्यक्षको साझा उमेदवार बनाउने औपचारिक निर्णय गरेको हो ।

 

अधिकारी महासंघ चितवन शाखाको वर्तमान उपाध्यक्षसमेत हुन् । महासंघ चितवनका वर्तमान अध्यक्षसँगै अग्रमोर्चामा रहेर पत्रकारको दुर्घटना बिमा, अक्षयकोष निर्माण, क्षमता विकास तालिमलगायतका काम गरेर चितवनका पत्रकारको मन जितिसकेका छन् ।

 

दुई दशकदेखि राष्ट्रिय समाचार समिति चितवन प्रमुख रहेका अधिकारी चितवनको पत्रकारितामा लोकप्रिय व्यक्तिका रुपमा चिनिन्छन् । भरतपुर-११ निवासी अधिकारीले केही सञ्चारमाध्यममा सफल व्यवस्थापकीय जिम्मेवारी पूरा गरिसकेका छन् । उनले हाम्रो एफएमको स्टेसन म्यानेजर, कायाकैरन दैनिकको संस्थापक प्रधान सम्पादक भएर काम गरिसकेका छन् ।

 

प्रेस युनियन चितवनका अध्यक्ष अनिल ढकालले सक्षम नेतृत्वका रुपमा अधिकारीलाई साझा उमेदवार घोषणा गरिएको बताए । पत्रकार महासंघका केन्द्रीय सदस्य सिर्जना अर्यालले पत्रकार हकहितमा दुई दशक बढी सक्रिय अधिकारीले चितवनका सबै पत्रकारलाई ऐक्यबद्ध बनाउन सक्ने बताइन् ।

 

युनियनका केन्द्रीय सदस्य बसन्त पराजुलीले चितवनको महासंघको नयाँ नेतृत्वमा नारायण अधिकारीलाई जिताउन आह्वान् गरे । चितवनका अग्रज पत्रकार गणशेखर शर्माले नेतृत्वमा निखारिएका अधिकारीको जीत सुनिश्चित रहेको बताए ।

 

महासंघ चितवनका संस्थापक सदस्य तथा उपसभापति रमेशकान्त पौडेलले सबैलाई मिलाएर लैजाने क्षमता भएका अधिकारीलाई साझा उमेदवार बनाइएकोमा खुसी व्यक्त गरे । युनियन चितवनका सल्लाहकार पूर्णप्रसाद शर्मा, फोनिज चितवनका अध्यक्ष सन्दीपकुमार श्रेष्ठ, वरिष्ठ पत्रकार ईश्वर जोशी, युनियनका पूर्वकेन्द्रीय सदस्य शारदा पौडेलले नारायणप्रसाद अधिकारीलाई जिताउन चितवनका पत्रकार एकजुट हुन आह्वान् गरेका छन् ।

 

अधिकारी अध्यक्ष भएका बेला प्रेस युनियन चितवनले पत्रकारहरुका संघ-संगठनकै पहिलो भवन बनाउने भूमिका निर्वाह गरेका थिए । समाजसेवी मैयादेवी श्रेष्ठले उपलब्ध गराएको बसेनीस्थित जग्गामा करिब ६० लाख रुपैयाँ सहयोग जुटाएर प्रेस युनियन चितवनको भवन बनाउने कामको अगुवाइ गरेका थिए ।

 

प्रेस युनियन चितवनले जिल्लाका अन्य पत्रकार संगठनलाई नारायणप्रसाद अधिकारीको नेतृत्वमा नयाँ कार्यसमिति बनाउने गरी सहकार्य गर्नसमेत आह्वान गरेको छ ।