काठमाडौँ । अग्रज पत्रकार सुशील शर्माको ६३ वर्षका उमेरमा काठमाडौँको चावहिलस्थित ओम अस्पतालमा शुक्रबार निधन भएको छ ।   

 

शर्माले एक वर्षअघि फिस्टुलाको शल्यक्रिया गराएका थिए । रोग पूर्णरुपमा निको नभई समस्या भोगिरहेका उनको शुक्रबार निधन भएको पारिवारिक स्रोतले जनाएको छ  । तीनदिनदेखि उनी सोही अस्पतालमा उपचाररत थिए ।  

 

राइजिङ नेपाल, काठमाडौँ पोष्ट, स्पोटलाइट र बिबिसी नेपाली सेवामा लामो समयसम्म पत्रकारिता गरेका वरिष्ठ पत्रकार शर्माले नेपाल वातावरण पत्रकार समूहका कार्यसमितिमा रही केही समय योगदान पुर्‍याएका थिए । 

 

आफूमात्र होइन, पत्रकारिता क्षेत्रमा लाग्ने सबै व्यक्ति मेहनती र इमान्दार हुनुपर्छ भन्ने मान्यतामा प्रतिबद्ध रहेका उनमा मिलनसार, देखेको कुरा भन्ने र लेखेका कुरामा अडिग स्वभाव रहेको उनका समकक्षी वरिष्ठ पत्रकार तीर्थ कोइरालाले स्मरण गरे ।   

 

उनको पशुपति आर्यघाटमा दाहसंस्कार गरिँदैछ । स्व शर्माका श्रीमती र एक छोरा छन् । 

 

 

नेपाली कांग्रेसका सभापति शेरबहादुर देउवाले वरिष्ठ पत्रकार सुशील शर्माको निधनप्रति दुःख व्यक्त गरेका छन् । पत्रकार शर्माको काठमाडौँको ओम अस्पतालमा उपचारका क्रममा ६३ वर्षको उमेरमा निधन भएको हो । स्व शर्माले लामो समयसम्म बीबीसी नेपाली सेवामा काम गरेका थिए । 

 

सभापति देउवाले शोक विज्ञप्तिमार्फत उनको निधनको खबरले आफूलाई अत्यन्त दुःखी बनाएको उल्लेख गर्दै शर्माले पत्रकारिताको क्षेत्रमा उल्लेखनीय योगदान पुर्‍याएको बताएका छन् । 

 

उनको निधनबाट पत्रकारिताको क्षेत्रमा अपूरणीय क्षति पुगेको उल्लेख गर्दै सभापति देउवाले शोक सन्तप्त परिवारजनमा समवेदना प्रकट गरेका छन् । 

 

यसैबीच, स्वं शर्माको निधनको खबरले आफू स्तव्ध भएको भन्दै नेपाल अमेरिका पत्रकार समाज (नेजा) का कार्यबाहक अध्यक्ष विकासराज न्यौपानेले गहिरो शोक प्रकट गरेका छन् । 

 

निर्भिक एवं पत्रकारिताको मूल्य र मान्यताप्रति अडिग अग्रज पत्रकार शर्माको निधनले पत्रकारिता क्षेत्रमा अपूरणीय क्षति पुगेको बताएका छन् । उनले दिवंगत आत्माको चिरशान्तिको कामना गर्दै शोकसन्तप्त परिवारजनप्रति समवेदना प्रकट गरेका छन् ।