काठमाडौँ । नेपालमा पछिल्लो २४ घन्टाभित्र थप ९७९ जनामा कोरोना संक्रमण पुष्टि भएको छ । देशभरका ३९ वटा प्रयोगशालामा गरिएको १० हजार ३८२ जनाको पिसिआर परीक्षणका क्रममा ९७९ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।

सोमबार नियमित पत्रकार सम्मेलनमा प्रवक्ता डा जागेश्वर गौतमले दिएको जानकारीअनुसार कोरोना संक्रमितको संख्या ४७ हजार २३६ पुगेको छ । जसमा १६ हजार २५९ जना संक्रमित उपचाररत छन् । पछिल्लो समय कोरोना संक्रमण समुदायस्तरमा फैलिएपछि देशभर ५० भन्दा बढी जिल्लामा निषेधाज्ञा जारी गरिएको छ ।

मन्त्रालयका अनुसार चितवन, काठमाडौँ, ललितपुर, भक्तपुर, मोरङ, सुनसरी, झापा, मकवानपुर, धनुषा, पर्सा, रौतहट, महोत्तरी, सप्तरी, सर्लाही, बारा, डोटी, बाजुरा, कैलाली, कन्चनपुर, पाल्पा, पश्चिम नवलपरासी, दाङ, बाँके, दैलेख, अछाम र रुपन्देहीमा ५०० भन्दा बढी संक्रमित रहेका छन् । सोलुखुम्बु, मुस्ताङ, ताप्लेजुङ, डोल्पा र हुम्लामा संक्रमितको संख्या शून्य छ ।  

प्रवक्ता डा जागेश्वर गौतमले पछिल्लो २४ घन्टामा कोरोना सङ्क्रमणबाट चार महिला र सात पुरुष गरी ११ जनाको मृत्यु भएको जानकारी दिए । योसँगै नेपालमा कोरोना भाइरसको संक्रमणबाट मृत्यु हुनेको संख्या ३०० पुगेको छ । जसमा २१५ पुरुष र ८५ महिला रहेका छन् ।

सोमबार काठमाडौँ उपत्यकामा ३२६ जनामा कोरोना पुष्टि भएको छ । जसमा काठमाडौँमा २९३, ललितपुरमा २० र भक्तपुरमा १३ जना रहेका छन् । यससँगै राजधानीभित्र संक्रमित हुनेको संख्या ८५८० पुगेको छ । जसमा काठमाडौँका ६९१७, ललितपुरका ९३९ र भक्तपुरका ७२४ जनामा कोरोना सङ्क्रमण भएको पुष्टि भएको मन्त्रालयले जनाएको छ ।

पछिल्लो २४ घन्टामा देशरभरका ४५ जिल्लामा नयाँ सङ्क्रमित भेटिएका छन् । जसमा मकवानपुरका ७३ जना, सुनसरीका ६५, धनुषाका ४४, बाँकेका ४२, सिराहा, बर्दिया र रुपन्देहीका ४१/४१ जना, मोरङका ३९, कास्कीका ३०, काभ्रेका २८, सर्लाहीका २०, सप्तरी, चितवन र सुर्खेतका १९/१९ जना, गोरखाका १८, झापा र नवलपुरका १६/१६ जना र लमजुङका १५ जनामा संक्रमण पुष्टि भएको छ ।

गुल्मीका ८ जना, कञ्चनपुरका ७ जना, पाँचथर र तनहुँका ६/६ जना, पाल्पाका ५ जना, महोत्तरी, दोलखा, सिन्धुपाल्चोक, दैलेख र कैलालीका ३/३ जना, कपिलवस्तु, नवलपरासी र कालीकोटका २/२ जना तथा उदयपुर, भोजपुर, सोलुखुम्बु, सिन्धुली, पर्वत, प्युठान, जाजरकोट, जुम्ला, बझाङ र बाजुराका १/१ जनामा संक्रमण पुष्टि भएको छ ।

प्रवक्ता डा गौतमका अनुसार हालसम्म ७ लाख ७७ हजार ५६३ जनाको पिसिआर विधिबाट परीक्षण गरिएको छ भने ३ लाख १२ हजार ४०२ जनाको आरडिटी विधिबाट परीक्षण गरिएको छ । उनका अनुसार हाल ४ हजार ७३९ जना क्वारेन्टाइनमा र १६ हजार २५९ जना आइसोलेसनमा रहेका छन् ।  

जसमा संस्थागत आइसोलेसनमा ९ हजार ६६ र होम आइसोसनमा ७ हजार १९० जना रहेका छन् । जसमध्ये १७१ सङ्क्रमितको अति सघन कक्षमा उपचार भइरहेको छ भने १९ जनालाई भेन्टिलेटरमा राखेर उपचार भइरहेको प्रवक्ता गौतमले बताए । 

त्यस्तै, सोमबार एकैदिन कोरोना संक्रमण निको भई १७३६ जना डिस्चार्ज भएका छन् । हालसम्म डिस्चार्ज हुनेको संख्या ३० हजार ६७७ पुगेको छ । जुन कुल संक्रमितको ६५ प्रतिशत हो ।