भरतपुर । पत्रकार शालिकराम पुडासैनीको आत्महत्या प्रकरणमा आत्महत्या दुरुत्साहन मुद्दा चलाइएका चर्चित सञ्चारकर्मी रवि लामिछानेलाई चितवन जिल्ला अदालतले सोमबार साँझ रिहा गरेको छ ।

 

जिल्ला अदालत चितवनका न्यायाधीश हेमन्त रावलको इजलासले लामिछानेलाई पाँच लाख रुपैयाँ धरौटीमा रिहा गर्न आदेश दिएको हो ।  

 

सरकारी वकिलको तर्फबाट गोपीलाल देवकोटा, राजकुमार श्रेष्ठ, स्वागत नेपाललगायत आठ अभिवक्ताले बहस गरेका थिए भने प्रतिवादीको तर्फबाट सुशील पन्त, सुभाष पोखरेल र राजु थापाले बहस गरेका थिए । 

 

आरोपितहरुमध्ये पत्रकार युवराज कँडेललाई तीन लाख रुपैयाँ धरौटी र अस्मिता कार्की लाई साधारण तारेखमा रिहा गरिएको हो । पत्रकार पुडासैनीले आत्महत्या गर्नुअघि रेकर्ड गरिएको भनिएको भिडियोको आधारमा चितवन प्रहरीले सञ्चारकर्मी लामिछानेसहित युवराज कँडेल र अस्मिता कार्कीलाई आत्महत्या दुरुत्साहनअनतर्गत मुद्दा दायर गरेको थियो । मुद्दामा आरोपितहरुसँग अदालतले आइतबार र सोमबार दुई दिन लगातार बयान लिएको थियो । 

 

जिल्ला न्यायाधीश हेमन्त रावलको इजलासमा उनीहरुको बयान सकिएपश्चात् थुनछेकको लागि मुद्दाको पक्षमा र विपक्षमा वकिलहरुले बहस गरेका थिए ।

 

आत्महत्या प्रकरणमा संलग्न भएको आरोपमा चितवन प्रहरी र काठमाडौँ प्रहरीको संयुक्त टोलीले सञ्चारकर्मी लामिछाने र कँडेललाई साउन ३० गते साँझ न्यूज २४ टेलिभिजनको कार्यालयबाटै  पक्राउ गरी चितवन ल्याएको थियो । अर्की आरोपित अस्मिता कार्कीलाई भने साउन २९ गते नै प्रहरीले काठमाडौँको कलंकीबाट पक्राउ गरेको थियो ।

 

पत्रकार पुडासैनी साउन २० गते चितवनको होटल कंगारुमा झुण्डिएको अवस्थामा फेला परेका थिए । पुडासैनी पत्रकार रविकै टिममा रहेर सीधा कुरा जनतासँग कार्यक्रममा रिपोर्टिङ गर्दै आएका थिए ।  दुई महिनाअघिमात्रै उनी सो टिम छाडेर माउन्टेन टेलिभिजनमा कार्यक्रम चलाउँदै आएका थिए ।