नारायणगढ । चितवनको नारायणगढस्थित पोखरा बसपार्कमा रहेको कंगारु होटलमा माउन्टेन टिभीका पत्रकार २७ वर्षीय शालिकराम पुडासैनी झुन्डिएको अवस्थामा फेला परेका छन् । 

 

नुवाकोटको बेलकोटगढी नगरपालिका वडा नं ३ स्थायी निवासी पुडासैनी लामो समय पत्रकार रवि लामिछानेको दाहिने हात भई न्यूज २४ टेलिभिजनमा ‘सीधा कुरा जनतासँग’ कार्यक्रमको समूहमा रहेर काम गर्दै आएका थिए ।

 

डेढ महिनाअघिमात्र सो समूहबाट बिदा भई माउन्टेन टिभीमा ‘मिसन न्यूज’ सञ्चालन गर्दै आएका थिए । उनी निडर र जोखिम मोलेर खोजी पत्रकारिता गर्न रुचाउने पत्रकार थिए । पारिवारिक स्रोतअनुसार उनी तराईमा बाढी र डुबानको रिपोर्टिङ गर्न काठमाडौँबाट चितवन गएका थिए । 

 

सोमबार दिउँसो साढे ३ बजेको समयमा उनी आफैँले कंगारु होटलको कोठा नं २०२ बुक गरी बसेका थिए । बेलुकी खाना खान होटलका कर्मचारीले खबर गर्न जानेक्रममा उनको शव झुन्डिएको अवस्थामा फेला परेपछि सञ्चालकले राति १० बजे प्रहरीलाई खबर गरेका थिए ।    

 

उनी झुन्डिएको अवस्थामा फेला परे पनि घटनाको प्रकृति आत्महत्याजस्तो देखिँदैन । खुट्टा भुइँमा र खाटमा टेकेको अवस्थामा आत्महत्या हुनै नसक्ने भन्दै मृतकका आफन्तले हत्या भएको हुनसक्ने आशंका गरेका छन् । मृतकका भाइ तथा आफन्तले मंगलबार दिउँसो घटनास्थलको अवलोकनपश्चात् घटनाको सत्यतथ्य अनुसन्धान गरी दोषीलाई कारबाही गर्नुपर्ने माग गरेका छन् । 

 

मृतकका आफन्तहरुका भनाइअनुसार बेथिति, विसंगति, भ्रष्टाचार र अनियमितताको भण्डाफोर गर्ने निर्भिक पत्रकार शालिकरामलाई विभिन्न समूहको धम्की आउने गरेको थियो । सधैँ उत्साही र अरुलाई समेत उतप्रेरणा दिने स्वभावका शालिकरामले आत्महत्या गर्नुपर्ने कुनै कारण नरहेको बताउँदै उनीहरुले घटना सुनियोजित हुनसक्ने आशंका व्यक्त गरेका छन् । 

 

आफन्तले हत्या भएको आशंका गरे पनि जिल्ला प्रहरी कार्यालयका प्रमुख एसपी दानबहादुर मल्लले भने पोष्टमार्टमको रिपोर्ट नआई मृत्युको कारणबारे थाहा नहुने बताएका छन् । उनी भन्छन्, ‘शवको पोष्टमार्टमका लागि मृतकका आफन्त सहमत भएका छन् । उहाँहरुसँग त्रिवि शिक्षण अस्पताल काठमाडौँमा लगेर पोष्टमार्टम गर्ने सहमति भएको छ । सबै कुरा पोष्टमार्टमको रिपोर्ट आएपछि थाहा हुन्छ ।’ 

 

चितवन प्रहरीले घटना रहस्यमय रहेकाले थप प्रमाण जुटाउन लागिपरेको बताएको छ । होटलमा सिसी क्यामेरा नरहेकाले अनुसन्धान गर्न केही कठिनाइ परेको एसपी मल्लको भनाइ छ । 

 

यसैबीच, चितवन प्रहरीका सूचना अधिकारी एवम् प्रवक्ता एकनारायण कोइरालाका अनुसार मृतकका आफन्तले कंगारु होटलका सञ्चालक यज्ञबहादुर कार्कीविरुद्ध किटानी जाहेरी दिएका छन् । जाहेरीका आधारमा होटल सञ्चालकलाई प्रारम्भिक अनुसन्धानका लागि नियन्त्रणमा लिइएको उनको भनाइ छ ।