भरतपुर । राष्ट्रिय प्रजातन्त्र पार्टी चितवनले २०४७ सालयताका उच्च पदस्थ व्यक्तिहरुको सम्पत्तिको छानबिन गर्न माग गरेको छ ।
मंगलबार प्रधानमन्त्री केपी शर्मा ओलीलाई २२ बुँदे मागपत्र बुझाउँदै राप्रपाले यस्तो माग गरेको हो । देशैभर मागपत्र बुझाउने केन्द्रीय कार्यक्रमअनुसार चितवनमा पनि प्रमुख जिल्ला अधिकारीलाई विभिन्न २२ बुँदे मागपत्र बुझाएको हो ।
मागपत्र बुझाउँदै चितवनको राप्रपा जिल्ला कार्यसमितिले आफूहरुको मागलाई गम्भीरताका साथ लिनुपर्नेमा ध्यानाकर्षण गराएको छ । फागुन मसान्तसम्म पनि आफ्ना माग पूरा नभए सशक्त आन्दोलनमा उत्रने चेतावनी दिइएको छ ।
राजसंस्थासहित सबै राजनीतिक शक्तिहरु अटाउने गरी गोलमेच सम्मेलन गर्न पनि राप्रपाले माग गरेको छ । यस्तै जबर्जस्ती धर्म परिवर्तन गराउने कार्य नियन्त्रण गर्न र धर्म परिवर्तनमा संलग्न गैरसरकारी संस्थाहरुलाई बन्द गर्नसमेत राप्रपाले जोडदार माग गरेको छ ।
धर्मनिरपेक्षता खारेज गरी हिन्दूराष्ट्र घोषणा गर्नुपर्ने, संघीयतामा जनमतसंग्रह गर्नुपर्ने, मेलम्ची र वाइडबडी जहाजमा भएको अनियमितता छानबिन गरी कारबाही गर्नुपर्नेलगायतका विषय पनि राप्रपाले बुझाएको माग पत्रमा उल्लेख छन् ।
चितवनमा पार्टीको केन्द्रीय कार्यक्रम अनुसार मागपत्र बुझाउने क्रममा राप्रपा चितवनका जिल्ला अध्यक्ष दिलीप पाण्डे, ३ नं प्रदेश सदस्य सनबहादुर गुरुङ, प्रवास विभागका श्याम पोखरेल, पार्टीका पदाधिकारी, नेता तथा कार्यकर्ताहरुको उपस्थिति रहेको वरिष्ठ उपाध्यक्ष जीवलाल पुरीले जानकारी दिए ।
प्रतिक्रिया