काठमाडौँ । प्रधानमन्त्री केपी शर्मा ओलीले प्रधानमन्त्री ओलीले सांसदलाई सरकारका काम कारबाहीका बारेमा जानकार हुन र विपक्षीले चलाएका निराधार हल्लाको पछि नलाग्न आग्रह गरेका छन् । उनले विपक्षीहरको खण्डन गर्न निर्देशनसमेत दिएका छन् ।
सत्ता र प्रतिपक्ष दुवैतर्फबाट सरकारले राम्रो काम गर्न नसकेको आरोप झेलिरहेका बेला सरकारले राम्रो काम गरिरहेको दाबी ओलीको छ । उनले विपक्षीले चलाएका हल्लाको पछि नलाग्न र मन्त्रीहरुले सांसदलाई मन्त्रालयले गरेका राम्रा कामहरुको प्रचार गर्न निर्देशन दिए ।
उनले राजनीतिक आन्दोलनहरु सफल हुने तर तिनका उपलब्धिको संरक्षण नहुने अवस्थाको अन्त्य गर्नुपर्ने बताएका छन् ।
नेपाल कम्युनिष्ट पार्टी (नेकपा)को संयुक्त संसदीय दल (सङ्घीय संसद् र राष्ट्रिय सभा)को बैठकमा उनले राजनीतिक आन्दोलनको उपलब्धि संस्थागत गर्नुपर्ने बताए ।
“२००७ सालमा राणा विरोधी आन्दोलन सफल भयो तर त्यसको उपलब्धिको संरक्षण भएन । २०४६ सालको आन्दोलन सफल भयो त्यसको पनि उपलब्धि संस्थागत भएन,” उनले भने, “२०६२र६३ को जनआन्दोलनका उपलब्धिलाई पनि संस्थागत र सफल हुन नदिने मनसाय बोकेका केही मानिसहरु छन् । तिनको मनसाय पूरा हुन दिनुहुँदैन ।”
प्रधानमन्त्री ओलीले आजदेखि शुरु संसद्को अधिवेशन विधेयक अधिवेशन भएकाले सरकारले संसद्मा पेश गरेका विधेयकहरुको गहन अध्ययन गर्न र त्यसमा सुझाव दिन सांसदहरुलाई निर्देशन दिए ।
“विधेयकहरु पारित भएपछि कानूनको रुपमा आउँछन् । त्यस कारण यसको गहन अध्ययन गर्नुहोस् । पार्टी नीति र सिद्धान्तअनुसार आफ्ना कुराहरु राख्नुहोस्,” उनले भने ।
प्रतिक्रिया