तनहुँ । आफैँले जन्म दिएको नवजात शिशुको हत्या गरेको आरोपमा एक महिला पक्राउ परेकी छन् ।
भानु नगरपालिका ३ दोरदोर निवासी ३७ वर्षीया लक्ष्मी गन्धर्व नवजात शिशुको हत्या आरोपमा पक्राउ परेकी हुन् ।
श्रीमान विदेश भएको समयमा परपुरुषसँग संसर्गपश्चात् गर्भ बसेर बच्चा जन्मिएकाले हत्या गरेको ती महिलाले स्वीकार गरेकी छिन् । घटनापछि फरार परपुरुषको समेत खोजी भइरहेको प्रहरीले जनाएको छ ।
मंगलबार भानु ३ चण्डीथोकस्थित पाखोबारीमा महिलाले लगाउने सुरुवालले घाँटीमा कसेर बेरेको अवस्थामा लिङ्ग पहिचान नभएको नवजात शिशुको शव फेला परेपछि स्थानीयले प्रहरीलाई खबर गरिदिएका थिए ।
प्रहरीको अनुसन्धानले लक्ष्मीले आफूले जन्म दिएको नवजात शिशुलाई सोही दिन आफैँले मारेर फालेको बताएको जिल्ला प्रहरी कार्यालय तनहुँका प्रमुख प्रहरी उपरीक्षक सिद्धिविक्रम शाहले जानकारी दिए ।
उनका श्रीमान् विगत चार वर्षदेखि वैदेशिक रोजगारीको सिलसिलामा कतारमा छन् । श्रीमान् विदेश भएको मौका छोपेर परपुरुषसँगको संसर्ग भएको र त्यसकै कारण बच्चा जन्मिएको अनुसन्धानमा खुलेको प्रहरीले जनाएको छ ।
परपुरुषको बच्चा भएकाले शिशु जन्मेकै दिन हत्या गरेको गन्धर्वले स्वीकार गरेकी छिन् । विदेशमा श्रीमान् भएका महिला परपुरुषको संगतमा परेर अनैतिक क्रियाकलाप गर्ने कारण थुप्रैको परिवार भताभुंग हुने गरेको छ ।
प्रतिक्रिया