भीमदत्तनगर । निर्मला पन्तको हत्यारा पक्राउ गर्न माग गर्दै कञ्चनपुरको भीमदत्तनगरमा नेपाल विद्यार्थी संघका कार्यकर्ताले बन्द अवज्ञा गरेको भन्दै जिल्ला सरकारी वकिल कार्यालयमा तोडफोड गरेका छन् । साथै उनीहरुले कर्मचारीमाथि हातपात गरेको समाचारमा जनाइएको छ ।
नेविसंघले भीमदत्तनगरपालिका–२ खोल्टीका १३ वर्षीया निर्मला पन्तको हत्यारा पक्राउ गर्न माग गर्दै एकदिने कञ्चनपुर बन्दको आह्वान गरेको थियो । बन्द अवज्ञा गरेको भन्दै नेविसंघ कार्यकर्ताले जिल्ला सरकारी वकिल कार्यालयमा कार्यरत नायब सुब्बा कृष्णदत्त भट्ट, अपरेटर मञ्जु भट्ट र कार्यालय सहायक धनवीर भाटमाथि हातपात गरेका हुन् ।
कार्यालय परिसरमा रहेको बा २ झ २७१५ नम्बरको कारसमेत तोडफोड गरिएको छ ।
भीमदत्तनगरमा प्रदर्शन गर्दै आइरहेका नेविसंघ कार्यकर्ताले बन्दमा कार्यालय किन खोलेको भन्दै कुटपिट र तोडफोडमा उत्रिएको सरकारी वकिल कार्यालयका कार्यालय सहायक भाटले बताए ।
कार्यालयभित्रै प्रवेश गरेका आन्दोलनकारीले कार्यालयमा समेत तोडफोड गरेका छन् ।
पन्त हत्या घटना भएको लामो समय बितिसक्दा पनि हत्यारा कानूनी दायरामा ल्याउन नसकेको भन्दै बन्द गरिएको नेविसंघ कञ्चनपुरले जनाएको छ । रासस
प्रतिक्रिया