काठमाडौं । प्रतिनिधिसभाको सभामुखमा नेकपा माओवादी केन्द्रका नेता कृष्णबहादुर महराले उम्मेदवारी दर्ता गराएका छन् ।
पुष्पकमल दाहाल 'प्रचण्ड' निवासमा बसेको कार्यालय बैठकले महरालाई सभामुखको उम्मेदवार बनाउने निर्णय गरेको थियो । त्यसलगत्तै महरा नेकपा एमालेका नेताहरुसँग संघीय संसद भवन नयाँ बानेश्वर पुगेका थिए । महराले नयाँ बानेश्वर पुगेर आफ्नो उम्मेदवारी दर्ता गराएका हुन् ।
महराको प्रस्तावकमा एमाले नेता तथा पूर्वसभामुख सुवास नेम्वाङ र समर्थकमा माओवादी केन्द्रकै देव गुरुङ रहेका छन् । संघीय संसद् सचिवालयले सार्वजनिक गरेको सभामुख चयनको कार्यतालिकाअनुसार शुक्रबार बिहान १० बजेदेखि दिउँसो १ बजेसम्म मनोनयनको समय तोकिएको छ ।
कार्यतालिकाअनुसार शनिबार दिउँसो १ बजे मतदानको समय तोकिएको छ । प्रतिपक्ष दल नेपाली कांग्रेसले भने उम्मेदवारी नदिने तयारी गरेको छ ।
कांग्रेस प्रवक्ता विश्वप्रकाश शर्माले भने, “हामीले सभामुख सर्वसम्मत चयन होस् भन्ने चाहेका छौं । राष्ट्रपतिमा विद्यादेवी भण्डारीको कामकारबाही प्रति चित्त नबुझेका कारण हामीले उम्मेदवारी दिएका हौं । तर, सभामुख सर्वसम्मत चयन होस् भन्ने चाहेका छौं ।” -एजेन्सी
प्रतिक्रिया