चितवन । करिब दुई महिना प्रहरीकै अनुशासन र जिम्मेवारी निभाउँदै चितवनबाट म्यादी प्रहरी बिदाई भएका छन् ।
मंसिर २१ गते प्रतिनिधिसभा र प्रदेशसभा निर्वाचनका लागि चितवनमा ५ सय महिलासहित १ हजार ७१० जना म्यादी प्रहरी निर्वाचनको मतदान सुरक्षामा खटिएका थिए । आफ्नो महत्वपूर्ण जिम्मेवारी पूरा गरी बिदाई हुँदा उनीहरु गहभरि आँशु बनाउँदै बिदा भएका हुन् ।
जिल्ला प्रहरी कार्यालय चितवनका प्रहरी प्रमुख एसपी दीपक थापाले म्यादी प्रहरीको काम निकै प्रशंसनीय रहेको जनाए ।
“प्रहरीको जत्तिकै काम कर्तव्यबोध गरी सबैले आआफ्नो जिम्मेवारी पूरा गरे । म्यादीलाई बिदाई गर्नुपर्दा म स्वयं पनि भावनात्मक रुपमा दुःखी भएँ”, उनले भने ।
चितवनमा मंसिर २१ गते सम्पन्न चुनावमा ५ सय महिलासहित १ हजार ७१० म्यादी प्रहरी खटिएका थिए । म्यादी प्रहरीको प्रभावकारी भूमिकाका कारण निर्वाचनलाई भयरहित र शान्तिपूर्ण बनाउन सहयोग पुगेको एसपी थापाले बताए ।
चितवनको इच्छाकामना गाउँपालिका १ काउलेकी सम्झना सापकोटाले पहिलोपटक अस्थायी रुपमै भए पनि सरकारी जागिर खाएको अनुभव संगालेर बिदाई हुँदा साह्रै भावुक बनेको प्रतिक्रिया दिइन् । उनीजस्तै साथीसँगै दुई महिना बिताएका साथीहरु छुट्टिने बेला गहभरि आँशु बनाएर बिदाई भएका थिए ।
लमजुङ बेशिसहरकी शोभाले भनिन्, “चुनावमा सुरक्षाकर्मीको रुपमा आफूलाई प्रस्तुत गर्दा निकै जिम्मेवारी बोध र गर्वको अनुभूति भयो । यहाँको अनुभवबाट अन्य ठाउँमा पनि केही गर्न सक्छु भन्ने आत्मविश्वास थपिएको छ ।”
म्यादी प्रहरीको जागिरबाट बिदाई भएपछि कमाइ भएको रकम केहीले परिवारको पालन, शिक्षा तथा व्यापारमा लगाउने बताएका छन् ।
चितवनको पहाडी इच्छाकामना गाउँपालिकाका सुकबहादुर प्रजाले दुई महिनाको कमाइको सदुपयोग गरी गाउँमा कुखुरा पालन गर्ने योजना बनाएको बताए ।
प्रतिक्रिया