चितवन– केन्द्रमा एमाले र माओवादी केन्द्रको चुनावी तालमेल र पार्टी एकीकरणको चर्चा भइरहँदा बेला चितवनमा वाम एकतालाई बल पुग्ने गरी माओवादीका मतदाताले एमाले उम्मेदवारलाई भोट हालेका छन् ।
चितवनमा स्थानीय तह निर्वाचनमा एकअर्काविरुद्धको मोर्चामा उभिएका नेकपा (एमाले) र माओवादी केन्द्र अन्ततः एउटै मोर्चामा सामेल भएर स्थानीय तह निर्वाचनको समापन गरेका हुन् । बुधबारसम्पन्न चितवन जिल्ला समन्वय समितिको निर्वाचनमा माओवादीले एमालेका उम्मेदवारलाई मत दिएर विजयी बनाएको छ ।
चितवन जिल्ला समन्व समितिका पदहरुमा निर्वाचित हुन एमालेसँग स्पष्ट बहुमत थियो । माओवादीले पनि एमालेलाई नै मत दिएपछि एमालेका उम्मेद्वार रहेका कृष्णकुमार डल्लाकोटी चितवन जिल्ला समन्वयन समितिको संयोजकमा चुनिए । संयोजकसहित सबै नौ पदमा एमालेका उम्मेदवारहरु विजयी भए ।
स्थानीय तहका प्रमुख उपप्रमुखले जिल्ला समितिको पदाधिकारी चुन्न मत दिन पाउँछन् । सातवटा स्थानीय तह रहेको चितवनमा एमालेले चारवटा नगरपालिकामा प्रमुख र उपप्रमुख जितेको थियो । माओवादीले भरतपुर महानगर र माडी नगरपालिकामा प्रमुखमात्रै जितेको थियो ।
नेपाली काँग्रेसले इच्छाकामना गाउँपालिकामा प्रमुख र उपप्रमुख तथा भरतपुर महानगरपालिकामा उपप्रमुख जितेको थियो । स्थानीय तह निर्वाचनमा चितवनको भरतपुरमा नेपाली काँग्रेस र माओवादी केन्द्रबीच चुनावी तालमेल भएको थियो । एक्लै चुनाव लडे पनि प्रमुख उपप्रमुख जित्ने हैसियत भएको काँग्रेसले भरतपुरमा माओवादीसँग चुनावी तालमेल गरेर मेयर पद नै माओवादीलाई छाडेको थियो ।
चितवनमा जिससका लागि मतदान गर्ने १४ मध्ये एमाले एक्लैको नौ मत थियो । काँग्रेसको तीन र माओवादीको दुई मत थियो । ‘गठबन्धनको पुरानो सहयात्री काँग्रेससँग पनि जित्नयोग्य मत थिएन । एमालेसँग नयाँ गठबन्धन भइसकेको अवस्थामा चितवन जिससमा एमालेकै उम्मेदवारलाई नै मत दिने निर्णय भएको थियो’ माओवादी केन्द्रका चितवन संयोजक यमबहादुर परियारले भने ।
माओवादीको पनि मत पाएका कारण एमालेका उम्मेद्वारहरु ११ मत ल्याएर जिससमा चयन भए । काँग्रेसले भरत अधिकारी संयोजक रहेको प्यानल मैदानमा उतारेको थियो । काँग्रेसका उम्मेदवारहरुले आफ्नो दलको तीन मतमात्रै प्राप्त गरे ।
माओवादीबाट भरतपुर महानगरपालिकामा मेयरमा निर्वाचित रेणु दाहाल र माडीमा मेयरमा निर्वाचित ठाकुर ढकालले जिससमा एमालेका लागि मत दिए । जिसस निर्वाचन नै स्थानीय तह निर्वाचनको अन्तिम बिन्दु हो ।
भरतपुरको चुनाव सम्पन्न हुँदा निकै उतार चढावहरु भएका थिए । मेयर उपमेयर दुवैमा पराजित भएको एमालेले भरतपुरको कार्यपालिका चुनावबाट नगरपालिका बोर्डमा बहुमत कायम गरेको छ । काँग्रेसले मत दिएर एमालेका उम्मेद्वार जिताएका कारण बोर्डमा एमालेको बहुमत पुगेको थियो । भरतपुर कार्यपालिका चुनाबमा माओवादी काँग्रेस गठबन्धन कायमै रहे पनि मत एमालेले पाएको थियो ।
आउँदो प्रतिनिधि सभा तथा प्रदेश सभा निर्वाचनका लागि एमाले, माओवादी केन्द्र लगायतका दलहरुको बाम गठबन्धन तयार भएको छ । गठबन्धनकै कारण हिजो चितवनमा एकअर्काको कट्टरविरोधी मोर्चामा उभिएका एमाले र माओवादी केन्द्र यतिखेर एकअर्काका सहयात्री भएर स्थानीय तह निर्वाचनको बिट मारेका छन् ।
प्रतिक्रिया