भरतपुर महानगरपालिका वडा नं. १९ को मतगणना विवादबारे सर्वोच्चले मागेको कागजपत्र र च्यातिएका ९० वटा मतपत्र जिल्ला निर्वाचन अधिकृतको कार्यालय र जिल्ला प्रशासन कार्यालयले आज पठाएका छन् ।
भरतपुरको कभर्डहलमा कपडाले पोको पारेर राखिएको मतपत्रलाई मतपेटिकामा राखेर शील गरी पठाइएको हो । मुख्य निर्वाचन अधिकृत कविलप्रसाद न्यौपाने, सहायक मतदान अधिकृत गम्भीर घिमिरे र प्रहरी नायव निरीक्षक गोविन्द श्रेष्ठ मतपत्र लिएर काठमाण्डौं जानु भएको छ । बिहानः ८ः१५ बजेको बुद्धएयरको फ्लाईट नम्बर ३६० ९ एन ए आई टी विमानबाट उहाँहरू काठमाण्डौं जानु भएको हो । उक्त मतपत्र आजै सर्वोच्च अदालत बुझाईने छ ।
जिल्ला प्रशासन कार्यालय चितवनले सर्वोच्चले माग गरेको तत्कालीन अवस्थाको प्रहरीको प्रतिवेदन पनि टोलीसँगै पठाएको छ । यस अघि आज बिहान दलका प्रमुख र प्रतिनिधि एवं उम्मेदवारहरुको रोहवरमा च्यातिएको मतपत्र मतपेटिकामा राखेर शील गरिएको थियो । सो मतपत्रलाई प्रहरीको स्कटिङमा भरतपुर विमानस्थलसम्म पु¥याएको प्रहरी प्रमुख दीपक थापाले बताउनुभयो ।
सर्वोच्च अदालतले भरतपुर महानगरपालिकामा च्यातिएका मतपत्र एक साताभित्र झिकाउन असार ६ गते मङ्गलवार आदेश दिएको थियो । कायममुकायम प्रधानन्याधीश गोपालप्रसाद पराजुली र न्यायधीश हरिकृष्ण कार्कीको संयुक्त इजलासले मतपत्र झिकाउन आदेश दिएको हो । फैसलाको भोलिपल्ट मात्रै मुख्य निर्वाचन अधिकृतको कार्यालयमा पत्र आएकाले पत्र पाएको सातौँ दिन आज कागजपत्र र मतपत्र पठाइएको हो ।
भरतपुर महानगरपालिका वडा नं। १९ को मतगणना जारी रहेको बेला माओवादीका कार्यकर्ताले मतपत्र च्यातेपछि यो विवाद सर्वोच्चमा पुगेको हो । महानगरका २९ वटा मध्ये २७ वटाको गणना सम्पन्न भएको छ भने १९ को अन्यौलमा रहेको छ । वडा नं। २० को मतगणना बाँकी रहेको छ । नेपाली काँग्रेस र माओवादी केन्द्रले पुनः मतदान गर्नुपर्ने माग गर्दै आएका छन् भने नेकपा एमालेले मतगणना जारी राख्नुपर्ने माग गर्दै सर्वोच्च पुगेको हो । निर्वाचन आयोगले १९ नम्बरमा पुनः मतदान गर्न निर्देशन गरेपछि एमाले सर्वोच्च गएको हो ।
प्रतिक्रिया