नारायणगढ । नारायणगढ–मुग्लिन सडक खण्डअन्तर्गत कालिखोलानजिक बिहीबार राति खसेको पहिरोले प्रहरी भ्यान र ट्रक बगाउँदा २ प्रहरीको मृत्यु भएको छ । प्रहरीको भ्यानसहित २ प्रहरी बेपत्ता भएका छन् ।
मृत्यु हुने प्रहरीमा धादिङ खनियाँबास गाउँपालिका ४ बस्ने वर्ष २९ को ईप्रका मुग्लिङमा कार्यरत प्रहरी सहायक निरीक्षक निश्चलकुमार तामाङ र बारा हरैया ६ वस्ने वर्ष ३० को ईप्रका मुग्लिङमा कार्यरत प्रज दीपककुमार मास्के रहेका छन् ।
बेपत्ता भएका प्रहरी जवानहरुमा गोर्खा मकैसिंह १ बस्ने वर्ष ३१ को ईप्रका मुग्लिङमा कार्यरत प्रज लीलबहादुर चेपाङ र तनहुँ रुपाकोट ३ बस्ने वर्ष २१ को ईप्रका मुग्लिङमा कार्यरत प्रज सन्दिप कार्की रहेका छन् ।
ईलाका प्रहरी कार्यालय मुग्लिङबाट प्रनि योगेन्द्र हमालको कमाण्डमा खटिएकोे टोलीले घटनास्थलमा २ जना प्रहरीको शव नदीको किनारमा पुरिएको अवस्थामा फेला पारेको थियो ।
प्रहरीसँगको हतियार एसएलआर २ नाल, त्यसमा लाग्ने गोली १०० राउण्ड, चाईनिज हत्कडी १ थान तथा संचार साधन सेट हराएको प्रहरीले जनाएको छ ।
घाइते ट्रक चालक रामकुमार लामाको अवस्था सामान्य र सहचालक मकवानपुर मनहरी बस्ने वर्ष २७ को सानु ब्लोन अवस्था मध्यम रहेको प्रहरीले जनाएको छ ।
ईलाका प्रहरी कार्यालय मुग्लिङबाट प्रसनि निश्चलकुमार तामाङको कमाण्डमा खटिइ गएको टोलीले अवरुद्द सडक एकतर्फी खुलाई ईलाका प्रहरी कार्यालय मुग्लिङतर्फ फर्कने क्रममा १।५ किमि अगाडि कालीखोला भन्ने स्थानमा शुक्रबार बिहान १ बजेको समयमा पहिरो झर्दा उक्त घटना भएको प्रहरीले जनाएको छ ।
बिहीबार राति १० बजेको समयमा ईच्छाकामना गाउपालिका–६ स्थित नारायणगढ मुग्लिङ सडक खण्डको चार किलो भन्ने स्थानमा पहिरो पन्छाएर प्रहरी टोली मुग्लिनतर्फ जाँदै थियो । ईलाका प्रहरी कार्यालय मुग्लिङको ना १ झ १३९० नंको प्रहरीसहितको भ्यान र ना ५ ख ७८२७ नंको ट्रकसमेत पहिरोले बगाएर सडकबाट तल झारेको प्रहरीको भनाइ छ ।
ना ५ख ७८२७ नंको ट्रकसमेत त्रिशुली नदीको किनारमा पूर्ण रुपमा क्षति भएको अवस्थामा रहेको छ । ट्रकको चालक र सहचालकलाई उद्धार गरी उपचारको लागि भरतपुर ल्याइएको छ । बेपत्ता भएका प्रहरी र ना१झ १३९० नंको प्रहरी भ्यानको खोजतलास जारी रहेको बताइएको छ ।
नारायणगढ सडक खण्डमा पहिरो खसी सडक अवरुद्द भएको र अझ पहिरो खस्न सक्ने सम्भावना रहेकोले यात्रुलाई सो सडक खण्डको वैकल्पिक बाटो अपनाउन र सोही सडक खण्डमा यात्रा गर्ने यात्रुहरुलाई सुरक्षा सतर्कता अपनाई मात्र यात्रा गर्न प्रहरीले अपिल गरेको छ ।
प्रतिक्रिया