गोहीको आक्रमणबाट बाँच्न सफल पश्चिम चितवनको जगतपुरका १२ वर्षीय अर्जुन हरिजनको उपचारका लागि विदेशमा बस्ने नेपालीहरुले आर्थिक सहयोग गरेका छन् ।
गत चैत २५ गतेको भरतपुर–२३ स्थित जगतपुर घैलाघारीका अर्जुनलाई साथीहरुसँग पौडीखेल्ने क्रममा गोहीले आक्रमण गरेको थियो । गोहीको आक्रमणबाट उनको हात भाँचिएको छ भने शरीरैभरि गहिरो घाउ लागेको छ । उनका साथीहरुले गोहीको आँखामा लौरोले हानेर गोहीको मुखबाट उनलाई छुटाएका थिए । उनको अहिले चितवन मेडिकल कलेजमा उपचार भइरहेको छ ।
विभिन्न सञ्चारमाध्यममा गोहीको मुखबाट बाँचेको समाचार आएपछि सहयोग जुट्नेक्रम तीव्र बनेको हो । उनको उपचारमा लागेको १ लाख २५ हजार रुपैयाँ तिर्न नसकेको खबर समाचारमा आएपछि देशविदेशमा बस्ने नेपाली र विभिन्न संघसंस्थामार्फत् शुक्रबार ५१ हजार रुपैयाँ सहयोग भएको छ ।
यसैगरी, चितवन सेवा समाज बहराइनबाट गोहीको आक्रमणबाट घाइते भएका बालकको उपचारार्थ ३५ हजार ५ सय संकलन गरी पठाइएको रकम शुक्रबार अन्तर्राष्ट्रिय समन्वय समिति नेपालका अध्यक्ष मुक्तिराम पोख्रेलले चितवन मेडिकल कलेजमा उक्त रकम उनको परिवारलाई हस्तान्तरण गरे ।
परोपकारी अभियानमा चितवनवासीको लागि चितवन युवा समूह भन्ने नारालाई साकार पार्न विश्वभरि रहेका चितवनेहरुको छाता संगठन चितवन युवा समूह, अन्तर्राष्ट्रिय समन्वय समिति नेपालले समन्वयकारी भूमिका खेलेको थियो ।
वैदेशिक रोजगारको लागि दुवईमा रहेका दिलीप विश्वकर्माको अगुवाईमा संकलित रकम नेपाल उत्पीडित जातीय मुक्ति समाज चितवनका अध्यक्ष विजयकुमार विश्वकर्माले बालकका आमाबुबा फूलमाया र रामबहादुर हरिजनलाई हस्तान्तरण गरेका थिए । दुवईमा रहेका नेपालीका सहयोगी हातहरु नामक संस्थाको पहलमा संकलन भएको रकमको सही सदुपयोग हुने विश्वकर्माले बताए ।
प्रतिक्रिया