चितवन । नारायणगढ–मुग्लिन सडकखण्डअन्तर्गत भरतपुर–२० स्थित कविलासको घुमाउने भन्ने ठाउँमा सोमबार सुख्खा पहिरो खस्दा दुई जनाको मृत्यु भएको छ ।
पहिरोमा परेर गम्भीर घाइते भएका दुई जनाको उद्धार गरी उपचारका लागि भरतपुरतर्फ ल्याउँदै गर्दा उनीहरुको बाटोमै मृत्यु भएको प्रहरीले जनाएको छ ।
मृतकको सनाखत हुन सकेको छैन । लमजुङका १५ बर्षीय सञ्जीव राना र वीरगञ्जका ३६ बर्षीय बन्नु पटेलको भरतपुर मेडिकल कलेजमा उपचार भइरहेको छ ।
जिल्ला प्रहरी कार्यालय चितवनका अनुसार, पहिरोमा परी पाँचवटा मोटरसाइकल, एउटा ट्रक, एउटा ट्याङ्कर, एउटा कार, एउटा टाटामोबाइल गाडीसहित ९ वटा सवारी साधन पुरिएको अनुमान छ ।
बिहान १०ः४० बजेको समयमा सुख्खा पहिरो जाँदा सडकमा गुडिरहेका सवारी साधनलाई पुरेको थियो । उद्धार कार्य जारी रहेकाले मृतकको सङ्ख्या पनि बढ्न सक्ने अनुमान प्रहरीले गरेको छ ।
शनिबारदेखि परेको पानीका कारण नारायणगढ–मुग्लिन सडकखण्डको घुमाउनेमा ढिस्को खस्दा सवारी साधन पुरिएको बताइएको छ । अहिले घाइतेको उद्धारकार्य जारी रहेको छ ।
यस सडकखण्डमा सडक विस्तारको काम भइरहेको छ । यही १५ गतेदेखि हरेक बिहान १० बजेदेखि ४ बजेसम्म बाटो बन्द गरेर विस्तार भइरहेको छ ।
चितवनका प्रमुख जिल्ला अधिकारी नारायणप्रसाद भट्ट, नेपाल प्रहरीका एसपी दीपक थापालगायतका सरकारी टोली घटनास्थल पुगेको छ । नेपाल प्रहरी, सशस्त्र प्रहरी र नेपाली सेनाको उद्धार टोली घटनास्थल पुगेको छ । प्रहरीका अनुसार सोमबार सडक खुल्ने सम्भावना निकै कम छ ।
प्रतिक्रिया