अर्घाखाँची । रोल्पा जिल्ला पाङ गाविस–५ निवासी दीपक विष्ट पाँच महिनादेखि हराएका थिए, कात्तिक ४ गते घरबाट हिँडेका विष्टलाई आफन्तले वनजङ्गल, खोल्साखाल्सी सबैतिर खोजे, रेडियो पत्रपत्रिकामा सूचना राखे ,परिवार रोए, कराए , तर कही कतै फेला पार्न सकेनन् ।
‘अब जिउँदो छैन होला भनेर हिन्दू संस्कार अनुसार काजकिरिया गर्नसमेत योजना बनाएको बेला उनकोे फेसबुकमा फोटा देखे’ । घुम्दै फिर्दै सन्धिखर्कमा आएका विष्टको फोटो फेसबुकमा राखे अर्घाखाँचीका समाजसेवी सहयोगी बिसीले ।
उनले फेसबुकमा पोस्ट गरेको फोटो देखेपछि आफन्तलाई लाग्यो, दीपक अझै जिउँदै रहेछन् । परिवारले खुसी हुँदै मसँग फोन सम्पर्क गरे समाजसेवी सहयोगी बिसीले भने ।
दीपक अर्घाखाँचीमा मसँग सुरक्षित हुनुहुन्छ भन्ने खबर दिए त्यही आधारमा बुबा रामबहादुर बिष्ट र भाइ टकबहादुर विष्ट सन्धिखर्कमा लिन आए । ‘जतिबेला उनी तीन जनाको भेट भयो एक किसिमको रुवावासी भयो ।’ खुसीका आँसु अनि एक आपसमा झम्टेर रुँदा हाम्रा आँखाबाट बर्बरी आँसु आयो बिसीले भने ।
‘दुई छोरी र एक छोराका पिता जो बोल्दै नबोल्ने, केही नभन्ने, नमाग्ने मान्छे बुबासँग भेट हुँदा खुट्टामा ढोग गर्दा र भाइलाई मुसारेर आर्शीवाद दिँदा खुसीको सीमा रहेन’ बिसीले बताए ।
झन्डै १० वर्ष पहिला इराकमा भिसा लागेर जान ठिक्क परेका बेला १२ नेपालीको हत्यापछि विदेश जान नपाउँदा र भिसा लागेको पैसा खेरगएपछि दीपकले मानसिक सन्तुलन गुमाएका थिए ।
उनलाई सन्धिखर्कबाटै काठमाडौँस्थित कोसिस संस्थामा उपचारका निम्ति पठाइएको छ । एउटा बेवारिसे व्यक्ति देखेर दुई,चारघन्टा समय दिँदा एउटा परिबारमा नयाँ खुसी ल्याउन सफल भएकोमा सहयोगी बिसी साह्रै खुसी छन् । रासस
प्रतिक्रिया