राजविराज । सप्तरीका बाढीपीडितका लागि निःशुल्क स्वास्थ्योपचार गर्न आएका डा गोविन्द केसी आइतबार दोस्रो दिन पनि उपचारमा व्यस्त छन् ।
आइतबार जिल्लाको तिलाठी गाविस– ७ स्थित पाठशालामा उहाँले निःशुल्क स्वास्थ्योपचार गर्दै छन् । सप्तरी उद्योग वाणिज्य सङ्घको संयोजन तथा तिलाठीका युवाको आयोजनामा डा केसीले त्यहाँ रहेका बाढीपीडितका लागि हाडजोर्नी तथा नसासम्बन्धी रोगको निःशुल्क उपचार गरिरहेका छन् ।
डा केसी आफैँले विभिन्न औषधि, फलफूललगायत सामग्री बोकेर सो ठाउँमा गएका हुन् । उक्त ठाउँमा आइतबारमात्रै उनले २५-३० जनाको निःशुल्क उपचार गरेकोे तिलाठीका युवक नीरज झाले जानकारी दिए ।
डा केसी आएको खबर पाएपछि सकरपुरा, लोनिया, रम्पुरा मल्हनियाँ, कोलाडीलगायत आधा दर्जन गाविसका बाढीपीडित उपचारका लागि लाइनमा छन् ।
यसैबीच, बाढीबाट प्रभावित छिमेकी भारतको सुपौल जिल्लाअन्तर्गत कुनोलीका पाँच बाढीपीडितलाई समेत डा केसीले आइतबार निःशुल्क उपचार गरेको बताइएको छ । यसअघि शनिबार डा केसीले तिलाठीस्थित राष्ट्रिय प्राथमिक विद्यालयमा एक सय २५ बाढीपीडितको उपचार गरेका थिए । रासस
प्रतिक्रिया