विराटनगर । घाँस काट्ने क्रममा रुखबाट लडेर मोरङमा एक जनाको मृत्यु भएको छ । पथरी–शनिश्चरे–११ बस्ने दानबहादुर राईको बिहीबार मृत्यु भएको पूर्व क्षेत्रीय प्रहरी कार्यालय, विराटनगरले जनाएको छ ।
घाँस काट्नका लागि रुखमा चढेका उनी लडेपछि गम्भीर घाइते भएका थिए । विराटनगरस्थित न्यूरो अस्पतालमा उपचारको क्रममा राईको मृत्यु भएको हो ।
बस दुर्घटनामा एक दर्जन घाइते
यसैबीच, झापाको दमक–चियाबगान सडकखण्डको बेतनी कल्र्भटमा शुक्रबार बिहान यात्रुवाहक बस दुर्घटना हुँदा १२ जना घाइते भएका छन् । घाइतेमध्ये बसमा सवार एक वृद्धाको अवस्था गम्भीर रहेको छ । काकड्भिट्टाबाट उदयपूरको बेल्टारतिर जाँदै गरेको मे १ ख ९७१ नम्बरको बस अनियन्त्रित भई पल्टिँदा बसमा सवार चालकसहित १२ जना घाइते भएका छन् ।
बिहान ७ः३० बजे दमक–१६ स्थित पूर्व–पश्चिम राजमार्गको बेतनी कल्भर्टमा उक्त बस अनियन्त्रित भएर पल्टिँएको हो । दुर्घटनामा परी घाइते भएकामध्ये बेल्टार–६ निवासी ६० वर्षीया याममाया कटुवाललाई थप उपचारका लागि विराटनगर पठाइएकोे इलाका प्रहरी कार्यालय दमकका प्रहरी नायब उपरीक्षक राजन लिम्बूले जानकारी दिए । अन्य घाइतेको दमकस्थित लाइफलाइन अस्पतालमा उपचार भइरहेको जनाइएको छ । रासस
प्रतिक्रिया