फाल्गुन २६, २०७२- नेपाल र चीनको संयुक्त लगानीमा सञ्चालित हिमालय एअरलाइन्सको पहिलो जेट विमान बुधबार काठमाडौंमा आइपुगेको छ ।
चीनको छेन्दुबाट तिब्बत एअरलाइन्सका पाइलटहरुले उडाएर ल्याएको यो जेट विमान युरोपेली कम्पनी एयरबसको ए–३२० सिरिज हो । नाइनएन–एलएलएम रजिष्ट्रेशन रहेको विमान त्रिभुवन अन्तर्राष्ट्रिय विमानस्थलमा अवतरण भएपछि एअरलाइन्सले वाटर क्यानन (पानी फोहोरा) ले सलामी र मंगल धुनले स्वागत गरेको थियो ।
‘पहिलो जहाजलाई स्वागत गर्न पाएकोमा निकै गौरव महसुस भएको छ,’ एअरलाइन्सका उपाध्यक्ष विजय श्रेष्ठले भने, ‘यस्ले नेपाललाई अन्तर्राष्ट्रिय समुदायसँग जोड्न थप मद्दत पुर्याउने छ ।’ उनले नयाँ जहाजको आगमनले नेपालको नागरिक उड्ययन क्षेत्रमा एक अध्याय थप भएको प्रतिक्रिया दिएका छन् । ‘म विश्वस्त छु कि हिमालय एअरलाइन्सले देशको पर्यटन क्षेत्र प्रबर्द्धन गर्ने उद्धेश्य लाई टेवा पुर्याउने छ ।’
एअरलायन्सको ब्रान्ड एण्ड सर्भिस इम्प्रुभमेन्ट विभागका अनुसार, यस्मा १ सय ५८ वटा सिट छन् । जसमध्ये ८ वटा बिजनेश र बाँकी १ सय ५० वटा इकोनोमी श्रेणीका रहेका छन् । यस्ले काठमाडौं विमानस्थललाई हब बनाउँदै सुरुमा भारतको राजधानी दिल्ली र कतारको राजधानी दोहामा उडान भर्ने विभागकी अधिकृत सहिष्णु पौड्यालले बताइन् ।
उनले आगामी अप्रेलदेखि उडान हुने भनिए पनि एकिन उडान तालिका तय हुन बाँकी रहेको बताइन् । कम्पनीले व्यापारिक उडानको सबै तयारी पूरा भइसकेको भनेको छ । यो कम्पनी यी दुई गन्तव्यपछि चीनको ल्हासा, चेंगदु र बेइजिङ्ग पनि उडान भर्ने योजना रहेको विज्ञप्ती मार्फत भनेको छ ।
यस्ले आगामी ५ वर्षभित्र एयरबसको ए–३२० सिरिजसहितका १५ वटा विमान थपेर जापान, कोरिया, युरोप, अमेरिका र अष्ट्रेलियासम्मको उडान गर्ने भनेको छ । सुरुमा विहान भारत र राति दोहा उडान भर्ने तालिका बनाएको कम्पनीले गत शुक्रबार कतारमा टिकट बिक्री गर्न सेलोपत्र ट्राभल्सलाई एजेन्टका रुपमा छनौट गरिसकेको छ ।
यस एअयरलायन्समा नेपाली कम्पनी यती इन्भेस्टमेन्ट समूह र चिनियाँ वायुसेवा कम्पनी तिब्बत एअरलायन्स आवद्ध छन् । साढे २ अर्ब लगानी रहेको कम्पनीमा नेपाली साझेदारको ५१ र तिब्बत एअरलायन्सको ४९ प्रतिशत लगानी रहेको छ । नेपालबाट हाल सरकारको स्वामित्व रहेको नेपाल वायुसेवा निगमले भारत, कतार, मलेसिया, हङकङ, थाइल्याण्ड तथा निजीबाट बुद्ध एयरले भारतमा अन्तर्राष्ट्रिय उडान भरिरहेका छन् । यो सूचीमा अब हिमालय पनि थपिएको छ ।
हिमालयअघि निजी क्षेत्रबाट अन्तराष्ट्रिय उडान अनुमति लिएको बिबि एयरवेजले विमान अभावका कारण सेवा बन्द गरेको छ ।साभार: कान्तिपुर
प्रतिक्रिया