चितवन, १४ माघ । रत्ननगर महोत्सव २०७२ आज बिहीबारदेखि टिकौली चौरमा सुरु भएको छ । महोत्सवको एक भब्य समारोहबीच उपराष्ट्रपति नन्दबहादुर पुनले उद्घाटन गरेका छन् ।

रत्ननगर उद्योग वाणिज्य संघ र रत्ननगर नगरपालिकाले आयोजना गरेको सो महोत्सव उद्घाटन कार्यक्रमलाई सम्बोधन गर्दै उपराष्ट्रपति पुनले मधेस आन्दोलन र नाकाबन्दी अन्त्यको लागि सार्थक पहल थाल्न सरकारलाई आग्रह गरेका छन् ।

नाकाबन्दी र मधेस आन्दोलनका कारण जनजीवन कष्टपूर्ण बनेको भन्दै उनले सहज वातावरण बनाउन सार्थक पहल थाल्न आग्रह गरेका हुन् । नाकाबन्दीले महङगी चुलिएको छ, जनताले दुख पाएका छन उनले भने यसको अन्त्य हुन जरुरी रहेको छ । नाकाबन्दीले व्यापार व्यवसाय चल्न नसकेका कारण त्यसको असर जनताको घरदैलोमा पुगेको उनको भनाइ रहेको थियो ।

जनताले भोगिरहेको समस्या छिट्टै सामधान हुन आवश्यक रहेको उनले बताए । मुलुकलाई लामो समयसम्म यस्तो अवस्थामा राख्नु हँुदैन उनले भने त्यसका लागि सरकारले अर्थपूर्ण र सार्थक प्रयास गर्न आवश्यक छ ।

भूकम्पपछि देशको आर्थिक अबस्थामा आएको गिरावट प्रति चिन्ता व्यक्त गर्दै उपराष्ट्रपति पुनले नेपालीले भोग्नु परेको वर्तमान पीडा छिट्टै अन्त्य हुनुपर्नेमा जोड दिए ।

उपराष्ट्रपति पुनले देशको आर्थिक विकासको लागि राज्य र निजी क्षेत्र बीच सहकार्य गरी लगानीको बतावरण सृजना गर्नुपर्ने बताए । लगानी सुरक्षा गर्ने दायित्व राज्यको रहेको भन्दै उपराष्ट्रपति पुनले मुलुकको आर्थिक विकासको लागि लगानी केन्द्रीत गर्न निजी क्षेत्रलाई आग्रह गरे । देशको विकास यात्रा सुस्त भएको भन्दै उनले निर्यात बढाएर विकासको गतिलाई तीव्रता दिनुपर्ने बताए ।

उनले देशका विभिन्न ठाउँमा हुने मेला महोत्सव शहर केन्द्रीत नभई ग्रमिण क्षेत्रमा हुनुपर्ने बताए । स्थानीय उत्पादनको प्रर्बधन र बजारीकरणको लागि मेला महोत्सव ग्रमिण क्षेत्रमा हुनुपर्ने उनले बताए ।

उपराष्ट्रपति पुनले रत्ननगर महोत्सवले मुलुकको आर्थिक विकामा सघाउने बताए । देशकै अग्रणी पर्यटकीय स्थलको रुपमा विकास भएको चितवन र त्यसका पनि सौराहाको पर्यटन र यहाँको कृषिलाई विकास गर्न सके त्यसले मुलुकलाई नै फाईदा हुने उनले बताए ।

कार्यक्रममा रत्ननगर उद्योग वाणिज्य संघका अध्यक्ष एवम् महोत्सव मुल समारोह समितिका संयोजक ज्ञानबहादुर विसुरालले पूर्वी चितवनमा विशेष आर्थिक क्षेत्र स्थापना गर्न सरकारलाई आग्रह गरे । नाकाबन्दी पछि र्सिजित परिस्थितिका कारण निजीक्षेत्र धरासायी बनेको भन्दै उनले व्यापार व्यवसाय प्रर्बधनको लागि आर्थिक प्याकेजका कार्यक्रम ल्याउनु पर्ने बताए ।

लगानीको वातावरण कमजोर, उर्जा संकट, लोडसेडिङका कारण जिनीक्षेत्रले निरास बनेको उनको भनाइ रहेको छ । कार्यक्रममा चितवन क्षेत्र नंं. २ का सांसद शेषनाथ अधिकारीले टिकौली चौरमा रंगशाला बनाउन कानुनी अडचन आए सोही ठाउँमा अन्र्तराष्टिय पार्क बनाउन सुझाव दिए ।

चितवनको कृषि, पर्यटन, शिक्षा, स्वास्थ्यको विकास र प्रर्बधन गर्ने उद्देश्यले आयोजना गरिएको सो महोत्सवमा ४५० वटा स्टरहरु राखिएको छ । महोत्सवमा बैकल्पिक उर्जाको मात्र १५ वटा स्टलहरु रहेका छन । यस वर्ष महोत्सवमा कृषि, पर्यटन र बैकल्पिक उर्जालाई प्राथमिकता दिइएको छ ।

यस पटकको महोत्सवमा ४ लाख पचास हजारभन्दा बढी दर्शकहरुले अवलोकन गर्ने र करीब २० करोडभन्दा बढीको कारोबार हुने अपेक्षा र अनुमान गरिएको उनले जानकारी दिए ।

कार्यक्रममा उपराष्ट्रपति पुनले संघले प्रकाशन गरेको स्मारिका विमोचनसमेत गरेका थिए । उद्घाटन कार्यक्रममा महोत्सव मुल समारोह समितिका उप संयोजक तथा रत्ननगर नगरपालिकाका निमित्त कार्यकारी अधिकृत सीताराम पोखरेल, उद्योग वाणिज्य महासंघका केन्द्रीय सदस्य दिलसुन्दर श्रेष्ठ, संघका महासचिव देवेन्द्रकुमार श्रेष्ठलगायतले बोलेका थिए । महोत्सव उद्घाटन हुनुपूर्व नेपाल उच्च माविबाट विभिन्न जातजाति, संघसंस्थाहरुले नगर परिक्रमा गर्दै शोभायात्रा गरिएको थियो ।