ड्यालस (टेक्सस) । गत निर्वाचनमा वर्तमान राष्ट्रपति डोनाल्ड ट्रम्पले विजय हासिल गरेको टेक्ससको ट्यारेन्ट काउन्टीमा पर्ने सिनेटमा डेमोक्रेटिक उम्मेदवार टेलर रेहमतले विजय हासिल गरेका छन् ।

शनिबारको चुनावमा रिपब्लीकन पार्टीकी उम्मेदवारलाई डबल डिजिटको अन्तरले रेहमतले हराएका हुन् । दुइ महिना अघिको निर्वाचनमा कुनै पनि उम्मेदवारले ५० प्रतिशत मत कटाउन नसकेपछि शनिबार रनअफ चुनाव भएको हो ।

रेहमतले ५६ प्रतिशत मत पाएका थिए भने उनका प्रतिद्वन्दी लेह वाम्सगन्सले ४३ प्रतिशत प्राप्त गरेकी थिइन् । गत सन् २०२४को चुनावमा ट्यारेन्ट काउन्टीमा डोनाल्ड ट्रम्पले ५१ दशमलव ८२ प्रतिशत मत पाएका थिए । डेमोक्रेटिक पार्टीकी कमला ह्यारिसले ४६ दशमलव ७० प्रतिशत मत पाएकी थिइन् ।

यस पटकको चुनावमा डेमोक्रेटिक पार्टीका रेमहत विजयी हुनुलाई वर्तमान ट्रम्प प्रशासनसँग मतदाता असन्तुष्ट रहेको संकेत देखिएको छ ।