ड्यालस, टेक्सास — संयुक्त राज्यका धेरै सहरहरूको तुलनामा सस्तो मानिँदै आएको ड्यालस–फोर्ट वर्थ (डी एफ डब्ल्यू) क्षेत्र अब आरामपूर्वक बस्न महँगो बन्दै गएको छ। यात्रा–वित्तसम्बन्धी अनुसन्धान समूह अप्ग्रेडेड पोइन्ट्स ले गरेको नयाँ अध्ययनका अनुसार ड्यालसमा एक जना एक्लो व्यक्तिले सहज जीवनयापन गर्न वर्षमा $१०७,००० भन्दा बढी कमाउनुपर्ने निष्कर्ष निकालेको छ। अध्ययनले ५०/३०/२० बजेट नियम प्रयोग गरेर मानिसले आफ्नो कमाइ कति किसिमले खर्च र बचत गर्न सक्छ भन्ने विश्लेषण गरेको छ।

परिवारको आकार बढ्दै जाँदा आवश्यक आय झन धेरै बढ्ने अध्ययनले देखाएको छ। दुई जना, बच्चा नभएका दम्पतीले आरामपूर्वक बस्न वर्षमा झण्डै $१३८,००० कमाउनुपर्ने छ भने एक बच्चा भएको दम्पतीको आवश्यकता $१८४,००० सम्म पुग्छ। त्यस्तै, पाँच जनाको संयुक्त परिवारलाई आरामसँग बस्न करिब $२६५,००० वार्षिक आय लाग्ने उल्लेख गरिएको छ। यस्तो आयले केवल जीवित रहन आवश्यक खर्च मात्र नभई, यात्रा, बाहिरी खानपान, मनोरञ्जन, कर्जा तिर्नु तथा दीर्घकालीन बचत गर्न पर्याप्त हुने मानिन्छ।

पहिले सस्तो भनेर चिनिने ड्यालसमा हाल जनसंख्या तीव्र गतिमा बढिरहेको छ। क्यालिफोर्निया तथा अन्य उच्च खर्च हुने राज्यबाट आएका मानिसहरू यहाँ बसाइ सराइपछि घर तथा भाडा मूल्य लगातार बढेको छ। फ्रिस्को, प्लानो, म्ककिनी जस्ता उपनगरदेखि ड्यालस भित्रका क्षेत्रमा भाडा र घरको मूल्यले धेरै नागरिकलाई दबाबमा पारेको छ। त्यस्तै, यातायात, स्वास्थ्य सेवा, बच्चा पालन, खाद्यान्न तथा दैनिक उपभोग्य वस्तु को मूल्य पनि तीव्र रूपमा बढ्दै गएको छ।

टेक्सासमा राज्य आयकर नभएको फाइदाले धेरैलाई सस्तो जस्तो लागे पनि, तेज मुद्रास्फीति र बढ्दो जीवन खर्चले यो फाइदा लगभग बराबरी बनाइदिएको अर्थशास्त्रीहरूको भनाइ छ। अध्ययनमा देखाएको आरामदायी आय स्तरसँग धेरै स्थानीयको कमाइ मेल खाँदैन। ड्यालस–फोर्ट वर्थमा हालको व्यक्तिगत औसत आय करिब $५१,००० मात्र छ, जुन सहजसँग बाँच्न आवश्यक रकमको आधाभन्दा कम हो।

यस अध्ययनले “बाँच्न” र “आरामसँग बाँच्न” बीच ठूलो अन्तर रहेको स्पष्ट पार्छ। आरामदायी जीवन भनेको केवल खाना, घर र बिल तिर्नु मात्र होइन, छुट्टी, शौक, पारिवारिक मनोरञ्जन तथा आकस्मिक अवस्थामा उपयोग हुने बचत को व्यवस्था गर्नु पनि हो। विशेष गरी बच्चा भएका परिवारहरूलाई चाइल्डकेयर र स्वास्थ्य खर्च ले थप दबाब दिने गरेको पाइन्छ।

यो परिवर्तनले ड्यालस–फोर्ट वर्थ क्षेत्रमा बढ्दै गएको नेपाली समुदायलाई पनि प्रत्यक्ष प्रभाव पारिरहेको छ। यहाँ हजारौँ नेपालीहरू सूचना प्रविधि (आईटी/टेक), शिक्षण, स्वास्थ्य सेवा, रेष्टुरेन्ट, होटेल, तथा विभिन्न कम्पनीहरूमा काम गरिरहेका छन्। मध्यम आयको क्षेत्रमा पनि धेरै नेपालीहरू वेयरहाउस, रिटेल, यातायात, डेलिभरी सेवा र श्रमसम्बन्धी काममा संलग्न छन्। त्यस्तै, धेरै नेपाली परिवारले रेष्ट्रोन्ट, किराना पसल, ट्रकिङ, होम–केयर सेवा, कन्स्ट्रक्सन, कन्ट्र्याक्टिङ तथा साना–ठूला व्यवसाय सञ्चालन गरेर आर्थिक प्रगति गरिरहेका छन्। समुदायको सहायताले नयाँ आउनेलाई केही सहज भए पनि, बढ्दो भाडा र दैनिक खर्चले धेरैलाई बजेट मिलाउन चुनौती दिएको छ। साझा बसोबास, आफ्नै व्यापार, तथा बहु–पीढी एकै घरमा बस्ने चलन अहिले नेपाली समुदायका लागि प्रभावकारी आर्थिक रणनीति बनेको छ।

ड्यालस अझै पनि रोजगारी र व्यवसायिक अवसरको ठूलो केन्द्र मानिए पनि, सहजसँग बाँच्न अब योजना, उच्च आय वा वैकल्पिक जीवनशैली आवश्यक हुने देखिन्छ।