अमेरिका—विश्वकै सबैभन्दा ठूलो अर्थतन्त्र—हाल गम्भीर आर्थिक चुनौतीको सामना गरिरहेको छ।

पछिल्ला तथ्यांकहरू, बजारको अवलोकन र उपभोक्ताको व्यवहारले देखाउँछ कि देशको आर्थिक गति सुस्त हुँदै गएको छ। खुद्रा व्यवसायको बन्द हुने क्रम, रोजगारीको गिरावट र उपभोक्ता खर्चमा कमीले समग्र अर्थतन्त्रमा गहिरो असर पारिरहेको छ।

खुद्रा बजारको संकट
२०२५ को पहिलो छ महिनामा मात्र १५ हजार भन्दा बढी स्टोरहरू बन्द भइसकेका छन्।

टार्गेट, मेसिज, वालग्रीन, पार्टी सिटी, बिगलट्स जस्ता ठूला ब्रान्डहरूले लागत कटौती र घट्दो मागका कारण सयौं आउटलेटहरू बन्द गरेका छन्। म्यासाचुसेट्सदेखि लस भेगाससम्मका खुद्रा केन्द्रहरू सुनसान देखिन थालेका छन्। लस भेगास स्ट्रिपमा पर्यटक आगमन ७ दशमलव ८ ले घटेको छ भने गेमिङ आम्दानीमा साँढे ६ प्रतिशतको वार्षिक गिरावट आएको छ।

रोजगारी संकट तीव्र
याहु फाईनान्स, एडिपीका अनुसार, मे २०२५ मा रोजगारी वृद्धिदर उल्लेखनीय रूपमा घटेको छ। निजी क्षेत्रले अपेक्षाकृत कम रोजगारी थपेको छ—बेरोजगारी भत्ताका लागि दर्ता हुनेको संख्या २ मिलियन नजिक पुगेको छ, जुन महामारीपछिको उच्चतम स्तर हो। खुद्रा क्षेत्रमा मात्र ७६ हजार कर्मचारी छँटनी भएका छन्, जुन गत वर्षको तुलनामा २७४ प्रतिशतको वृद्धि हो।

उपभोक्ता खर्चमा गिरावट
बिजनेस ईन्साइडरका अनुसार, २०२५ को दोस्रो त्रैमासमा जिडिपी वृद्धिदर –० दशमलव ५ प्रतिशतमा झरेको छ। उपभोक्ता खर्चमा मासिक –०.३ प्रतिशतमा गिरावट आएको छ, विशेष गरी सवारीसाधन र आपूर्ति क्षेत्रमा –६ प्रतिशतको गिरावट देखिएको छ। मूल्यवृद्धि (inflation) केही नियन्त्रणमा आए पनि खर्च घट्ने प्रवृत्ति जारी छ। धेरै उपभोक्ताहरू अब सस्तो विकल्प रोज्न थालेका छन्, र BNPL (Buy Now, Pay Later) जस्ता योजनामा निर्भरता बढ्दै गएको छ।

सेवा र निर्माण क्षेत्रमा पनि संकुचन
सेवा क्षेत्र र निर्माण उद्योगमा अर्डर घट्दै गएका छन्। उत्पादन गतिविधिमा कमी आएको छ, र धेरै कम्पनीहरूले कर्मचारीहरूलाई फिर्ता पठाउन थालेका छन्। मोड्डिजका प्रमुख अर्थशास्त्री मार्क जाण्डीले चेतावनी दिएका छन्: “अर्थतन्त्र अब मन्दीको छेउमा पुगेको छ।”

समग्र विश्लेषण
अमेरिकाको अर्थतन्त्रमा देखिएको यो सुस्तता केवल अस्थायी उतारचढाव होइन, संरचनात्मक परिवर्तनको संकेत हो। खुद्रा बजारको पुनर्संरचना, रोजगारी संकट, र खर्चमा गिरावटले आगामी महिनाहरूमा अझ चुनौतीपूर्ण अवस्था ल्याउने सम्भावना छ।

सुझावहरू

• उपभोक्ताहरू: खर्चमा सजग रहनु, आपतकालीन बचतमा ध्यान दिनु।
• व्यवसायहरू: अनलाइन प्रतिस्पर्धा सामना गर्न रणनीति पुनःनिर्माण गर्नु।
• नीतिनिर्माताहरू: दीर्घकालीन रोजगारी सहयोग र उत्पादनमा लगानी प्रवर्द्धन गर्न नीति ।