ड्यालस (अमेरिका) । नेपाल सरकारले टेक्ससको ड्यालसमा खडा गर्न लागेको कन्सुलेट कार्यालय स्थापनाको तयारी सुरू भएको छ ।

कन्सुलेट अफिस स्थापनाको स्थान छनोट, नेपाली समुदायसँग छलफलका लागि परराष्ट्र मन्त्रालयबाट पठाइएका दुइ उच्च अधिकारीहरू यही साता ड्यालस आउँदैछन् ।

कन्सुलेट कार्यालयका लागि परराष्ट्र मन्त्रालयले सहसचिव सुरेश अधिकारीको नेतृत्वमा कर्मचारीहरूको पोष्टिङ्ग गरिसकेको छ । अधिकारीलाइ टेक्ससको कन्सुलर जनरलको जिम्मेवारी नेपाल सरकारले दिएको छ । त्यस्तै कर्मचारी टोलीमा उपसचिव धनाकुमारी जोशी र शाखा अधिकृत प्रविण भट्टराइ रहेका छन् । परराष्ट्रले ड्यालस कन्सुलेट अफिसको लागि चारजना पठाउने निर्णय गरिसकेको छ । स्थानीय रूपमा अावश्यकता अनुसार केही कर्मचारी नियुक्ती गर्न सक्ने अधिकार समेत दिने नीति सरकारको छ ।

गत माघमा बसेको नेपाल सरकार मन्त्रीपरिषदको बैठकले अमेरिकाका दुइ शहर र युनाइटेड अरब इमिरेट्सको दुबइमा कन्सुलेट कार्यालय स्थापना गर्ने निर्णय गरेको हो। अमेरिकाको ड्यालस र सानफ्रान्सिस्कोमा कन्सुलेट कार्यालय स्थापना हुँदैछन्।

सानफ्रान्सिस्कोमा लक्ष्मण खनाल कन्सुलर जनरल नियुक्त भएर आइसकेका छन् ।

अमेरिकामा नेपाली समुदायको बढ्दो उपस्थितीका कारण वासिङ्गटन डिसीको दुतावास र न्यूयोर्कको कन्सुलेट अफिसले मात्र धान्न नसकेको गुनासो लामो समयदेखि उठिरहेको छ । यही विषयमा टेक्ससको नेपाली समुदायले गत असोजमा राष्ट्रसंघको महासभामा सहभागी हुन अएका प्रधानमन्त्री केपी शर्मा ओलीको ध्यानाकर्षण गरेका थिए ।

विशेषगरि पासपोर्टको नविकरणको मुद्धा लामो समयदेखि उठिरहेको छ । ड्यालस फोर्टवर्थ मेट्रोप्लेक्समा मात्र झण्डै ८० हजार नेपाली समुदायको बसोबास रहेको छ ।

टेक्ससको अस्टिन, ह्युस्टन, सानएन्टेनियो, लबक लगायत अन्य सिटीहरूमा समेत गर्दा एकलाखको हाराहारीमा नेपाली रहेको अनुमान छ ।

कन्सुलेट अफिस स्थापनाका लागि ड्यालस खटिएका नेपाली सरकारी अधिकारीहरूले नेपाली समाज टेक्सससँग मंगलबार छलफल गर्दैछन् । स्रोतका अनुसार अफिस स्थापनाको लागि स्थान एकिन नभएपनि संभवतः ड्यालस डाउनटाउन एरिया हुनसक्ने स्रोतले जानकारी दियो । कुटनैतिक नियोग भएको हुँदा नेपाली समुदाय र नेपाल सरकारले मात्र चाहेको स्थानमा राख्न मिल्दैन । सुरक्षा संवेदनशीलताका कारणले पनि डाउनटाउन उपयुक्त ठहर्याइएको छ ।

ड्यालसमा मेक्सिको, स्विजरल्याण्ड, डेनमार्क, क्यानडा, एलसाल्भाडोर, होण्डुरस, चिली, ग्वाटेमाला, दक्षिण कोरिया, थाइल्याण्ड, पेरू लगायत देशका कन्सुलेट कार्यालयहरू छन् ।

कन्सुलर अफिस राख्ने स्थानको पूर्व स्विकृती अमेरिकाको स्टेट डिपार्टमेन्टबाट लिनुपर्ने प्रावधान छ ।